ٹیسٹ ڈرائیو: ممکنہ خریدار دو ملین یورو کی فیراری لے اڑا

جرمنی کے مغربی شہر ڈسلڈورف کی پولیس کے مطابق یہ گاڑی چوری کر لینے والے شخص نے خود کو انتہائی مہنگی سپورٹس کاروں کے شوقین ایک امیر آدمی کے طور پر پیش کیا تھا، جس نے ایک اشتہار کے بعد اس گاڑی کو فروخت کرنے کے خواہش مند مالک کے ساتھ ملاقات اور تجرباتی طور پر گاڑی کو چلا کر دیکھنے کے لیے وقت اور جگہ کا تعین بھی کر لیا تھا۔

یہ فیراری سن 1985 میں تیار کی گئی سرخ رنگ کی جی ٹی ایس ماڈل کی ایک ایسی گاڑی بتائی گئی ہے، جو اس برانڈ کی انتہائی کامیاب اور اب نایاب ہو چکی کاروں میں شمار ہوتی ہے۔ ممکنہ خریدار اور گاڑی کا مالک جب پہلے سے طے شدہ جگہ پر پہنچے، تو ’گاہک‘ نے کہا کہ وہ یہ گاڑی چلا کر دیکھنا چاہتا ہے۔ اس پر مالک ڈرائیونگ سیٹ سے اترا اور اس شخص کے ساتھ والی سیٹ پر بیٹھنے کے لیے گھوم کر گاڑی کے دوسری طرف جا ہی رہا تھا کہ تب تک ڈرائیونگ سیٹ پر بیٹھا ’چور‘ مالک کے دیکھتے ہی دیکھتے یہ گاڑی لے اڑا۔

پولیس کے مطابق اس گاڑی کی قیمت تقریباﹰ دو ملین یورو یا 2.2 ملین امریکی ڈالر کے برابر بنتی ہے۔ اس کار کی خاص بات یہ ہے کہ ماضی میں یہی کار فاومولا ون موٹر ریسنگ کے عالمی چیمپئن شپ مقابلوں میں حصہ لینے والے برطانیہ کے معروف پیشہ ور ڈرائیور ایڈی اِروائن کی ملکیت رہی ہے۔

پولیس نے یہ نہیں بتایا کہ یہ واقعہ کب پیش آیا لیکن یہ تصدیق کر دی گئی ہے کہ تمام تر کوشش کے باوجود اس چوری شدہ فیراری اور چور کا تاحال کوئی پتہ نہیں چلا۔

اس تفتیش کے دوران اب تک بیس لاکھ یورو کی فیراری چوری کرنے والے شخص کی شناخت بھی نہیں ہو سکی حالانکہ چور اور مالک کی پہلی ملاقات کے وقت گاڑی کے مالک نے ممکنہ خریدار کے ساتھ اپنے موبائل فون سے ایک سیلفی بھی بنا لی تھی۔

بالکل اسی طرح کی فیراری سپورٹس کار سن 1980 کی دہائی میں ’میگنم‘ نامی امریکی ٹیلی وژن سیریز کے کردار تھامس میگنم کے استعمال میں بھی رہی ہے۔ اسی طرح کی اطالوی ساختہ انتہائی مہنگی سپورٹس کاریں ماضی میں کئی مشہور ٹی وی سیریز اور فلموں میں بھی استعمال کی جاتی رہی ہیں، جن میں سے امریکی ٹی وی سیریز ‘میامی وائس‘ کے علاوہ ’ڈے آف‘ نامی فلم اور جیمز بانڈ سیریز کی فلم ’گولڈن آئی‘ خاص طور پر قابل ذکر ہیں۔

م م / ع ا / اے پی، ڈی پی اے