نریندر مودی کی پاکستانی وزیراعظم سے ملاقات

اس بات کا اندازہ لگایا گیا ہے کہ آج منگل کے روز پاکستانی وزیراعظم نواز شریف کے ساتھ ملاقات کے دوران نریندر مودی دو طرفہ معاملات کے ساتھ ساتھ درپیش مسائل پر بھی گفتگو کر سکتے ہیں۔ نئی دہلی کے سیاسی تجزیہ کاروں کے مطابق آج کی ملاقات بظاہر رسمی دکھائی دیتی ہے کیونکہ مودی کو حلف اٹھانے کے بعد اپنی وزارت عظمیٰ کے پہلے دن کئی وفود سے ملاقات کرنا ہے۔ ان میں خاص طور پر سارک تنظیم کے چھ سربراہان کی نئی دہلی میں موجودگی کو اہم خیال کیا گیا ہے۔ سخت نظریات کے حامل مودی کی جانب سے سارک تنظیم کے لیڈروں کو اپنی تقریب حلف برداری میں مدعو کرنے کو اُن کی ممکنہ پالیسی سازی کے حوالے سے خاصا اہم سمجھا گیا تھا۔

مودی نے منصب وزارت عظمیٰ سنبھالنے کے بعد جو پیغام جاری کیا ہے، اس میں بھی انہوں نے ایک مضبوط اور ترقی یافتہ بھارت کی تشکیل و تکمیل کے خواب کا ذکر کیا ہے۔ پیر کے روزبھارت پہنچنے کے بعد پاکستانی وزیراعظم نواز شریف نے نئی دہلی ٹیلی وژن (NDTV) کو انٹرویو دیتے ہوئے مودی سرکار کے قائم ہونے کو دونوں ملکوں کے تعلقات کو بہتر بنانے کا ایک بڑا موقع قرار دیا ہے۔ نواز شریف کے مطابق ایک دوسرے کو اپنا اپنا موقف سمجھانے کا بھی چانس ہے کیونکہ دونوں حکومتوں کے پاس بھاری مینڈیٹ ہے۔ پاکستانی وزیراعظم کے مطابق وہ تعلقات کی ڈور اپنی سابقہ حکومت کے خاتمے کے وقت جاری روابط کے ساتھ جوڑنے کی کوشش کریں گے۔

پیر کے روز وزارت عظمیٰ کا حلف اٹھانے کے بعد نئے بھارتی وزیراعظم نریندر مودی کی 23 رُکنی کابینہ نے بھی حلف اٹھایا۔ ان وزرا میں اُن کے کلیدی ساتھی خاص طور پر نمایاں ہیں۔ ان میں بھارتیہ جنتا پارٹی کے سینیئر لیڈران نیتن گڈکاری، روی شنکر پرشاد، ارون جیٹلی اور راج ناتھ سنگھ خاص طور پر اہمیت کے حامل ہیں۔ بھارتی ایوانِ زیریں لوک سبھا میں خواتین کا تناسب گیارہ فیصد ہے لیکن مودی کی کابینہ میں خواتین کا تناسب پچیس فیصد ہے۔ خواتین وزرا میں سُشما سوراج، مینیکا گاندھی، نجمہ ہیپت اللہ، نرملا سیتا رامن، اُوما بھارتی اور سیمرتی ایرانی شامل ہیں۔

خاتون رہنما سُشما سوراج کو وزارت خارجہ کا منصب سونپا گیا ہے۔ وہ مئی میں اپنی مدت پوری کرنے والی لوک سبھا میں قائدِ حزب اختلاف تھیں۔ اس سے قبل بننے والی بھارتیہ جنتا پارٹی کی حکومتوں میں بھی وزیر رہ چکی ہیں۔ وزارت خزانہ کے لیے نریندر مودی نے ارُون جیٹلی کو منتخب کیا ہے۔ وہ ماضی میں بھارت کے کامرس اور ٹریڈ کے وزیر رہ چکے ہیں۔ بھارتیہ جنتا پارٹی کے موجودہ صدر راج ناتھ سنگھ کو وزارت داخلہ کا قلمدان سونپا گیا ہے۔ ممتاز مسلمان سیاستدان اور مذہبی رہنما مولانا ابوالکلام آزاد کی قدرے دور کی گرینڈ بھتجی نجمہ ہیپت اللہ کو اقلیتی امور کی وزارت دی گئی ہے۔