'عراقی شدت پسندوں نے‘ درگاہیں تباہ کرنا شروع کر دیں

انٹرنیٹ پر عراق کی ایک بڑی آبادی کے لیے انتہائی مقدس سمجھی جانے والی مذہبی عمارت کو آگ میں لپٹے ہوئے اور انتہا پسندوں کے ہاتھوں بموں کے ذریعے تباہ ہونے کے مناظر کی ویڈیوز سامنے آئی ہیں۔ مسلمان ممالک سمیت عالمی مقامات پر اس کے خلاف شدید رد عمل سامنے آیا ہے۔

عراقی شہریوں کے مطابق درگاہوں کی ’’بے حرمتی‘‘ کرنے والے عسکریت پسندوں کا تعلق اسلامک اسٹیٹ آف عراق اینڈ سیریا یا آئی ایس آئی ایس سے ہے۔

واضح رہے کہ آئی ایس آئی ایس حالہ کچھ ہفتوں ہی میں بہت تیزی کے ساتھ عراق کے کئی شہروں پر قابض ہو گئی ہے۔ کٹر اسلامی نظریے کی حامل اس تنظیم نے دارالحکومت بغداد کی جانب پیش قدمی شروع کی تھی تاہم اسے ناکام بنا دیا گیا۔ امریکا ان شدت پسندوں سے نمٹنے کے لیے عراقی وزیر اعظم نوری المالکی کی مدد کر رہا ہے۔ ایران نے بھی عراقی حکومت کو معاونت کی یقین دہانی کرائی ہے۔

قبل ازیں آئی ایس آئی ایس کے رہنما اور خلافت کے دعوے دار ابو بکر البغدادی نے دنیا بھر کے مسلمانوں کو حکم دیا تھا کہ وہ اس کی اطاعت کریں۔ البغدادی نے یہ بات ہفتے کو جاری کیے جانے والے ایک ویڈیو پیغام میں کہی۔

اس بصری پیغام میں البغدادی، جو کہ ایک سیاہ لباس پہنے ہوئے تھا، کچھ یہ کہتا دکھائی دیا ہے: ’’میں ولی ہوں تاکہ تمہاری قیادت کروں، اگرچہ میں تم میں سے بہترین نہیں ہوں۔ لہٰذا اگر تمہیں ایسا لگتا ہے کہ میں راست راہ پر ہوں تو میرا ساتھ دو۔‘‘

''اگر تمھیں لگتا ہے کہ میں غلط ہوں تو مجھے بتاؤ اور میری اصلاح کرو اور میری اطاعت کرو۔‘‘

دوسری جانب عراقی وزیر اعظم نے لیفٹیننٹ جنرل علی غیدان کو ان کے عہدے سے بر طرف کر دیا ہے۔ اس کے علاوہ وفاقی پولیس کے سربراہ محسن الکابی کو بھی عہدے سے ہٹا دیا گیا ہے۔

فوج اور پولیس کے عہدے داروں کے رد و بدل کے باوجود عراقی حکومت آئی ایس آئی ایس کو مکمل طور پر ختم نہیں کر پائی ہے۔

آئی ایس آئی ایس کی کارروائیوں نے عالمی برادری کو تشویش میں مبتلا کر دیا ہے۔ اس تنظیم کے تسلط میں آنے کے بعد ہزاروں شہری اپنے گھر بار چھوڑنے پر مجبور ہو گئے ہیں۔ وقت گزرنے کے ساتھ ساتھ عراق کے وزیر اعظم نوری المالکی پر دباؤ بڑھتا جا رہا ہے۔