شامی فورسز نے دوما سمیت مکمل مشرقی غوطہ کا قبضہ حاصل کر لیا

شامی حکومتی دستوں نے مشرقی غوطہ کے علاقے میں باغیوں کے زیر قبضہ آخری شہر دوما کا قبضہ بھی واپس حاصل کر لیا ہے۔ روسی نیوز ایجنسیوں نے ملکی عسکری ذرائع کے حوالے سے بتایا ہے کہ دوما کے مرکز پر شامی پرچم لہرا دیا گیا ہے۔

شام میں قائم روسی امن اور مفاہمت سینٹر کے سربراہ میجر جنرل یوری ییوتوشینکو کے مطابق، ’’دوما شہر ریاستی پرچم لہرائے جانے سے اس مقام اور اس کے ساتھ ہی پورے مشرقی غوطہ پر کنٹرول مکمل ہو گیا ہے۔‘‘

اگلے بہتر گھنٹوں میں شام پر فضائی حملے کا امکان

ٹرمپ کا شام میں ممکنہ عسکری کارروائی کا عندیہ، روس کی تنبیہ

دوسری طرف روسی وزارت دفاع کی طرف سے بتایا گیا ہے کہ دوما شہر میں قانون کی بالادستی قائم کرنے کے لیے روس کی عسکری پولیس بھی تعینات کر دی گئی ہے۔ وزارت دفاع کی طرف سے جاری ہونے والے بیان کے مطابق، ’’روسی ملٹری اہلکار اس شہر میں امن وامان اور قانون کی بالادستی کو یقینی بنائیں گے۔‘‘

خیال رہے کہ دوما باغیوں کے زیر قبضہ مشرقی غوطہ کا آخری علاقہ تھا۔ دوما شہر میں گزشتہ ہفتے ہونے والے مبینہ کیمیائی حملے کے نتیجے میں درجنوں ہلاکتوں کا بتایا گیا تھا۔ اس واقعے کے بعد سے شامی تنازعے پر امریکا اور روس کے درمیان تناؤ شدت اختیار کر گیا ہے۔ منگل کے روز امریکی صدر ڈونلڈ ٹرمپ نے اپنے ایک ٹوئیٹر پیغام میں روس کو خبردار کیا تھا کہ شام کو نشانہ بنانے کے لیے امریکا کے جدید میزائل جلد آ رہے ہیں۔