شامی اپوزیشن جنیوا کانفرنس میں شرکت کے لیے رضامند

ترکی کے شہر استنبول میں شامی اپوزیشن کے قومی اتحاد (Syrian National Coalition) نے اپنے اجلاس میں رائے شماری کے بعد کانفرنس میں شرکت کا فیصلہ کیا۔ ووٹنگ اتوار اور پیر کی درمیانی شب ہوئی۔ قومی اتحاد نے کانفرنس میں شریک ہونے کے لیے دو تین شرطیں بھی رکھی ہیں۔ ان میں ایک کے تحت اسد حکومت کو محاصرے میں کیے گئے قصبوں اور شہروں تک انسانی امداد کے اداروں کو رسائی فراہم کرنا ہو گی تا کہ ان مقامات پر محصور انسانوں تک امدادی سامان کی ترسیل ممکن ہو سکے۔ دوسری شرط یہ ہے کہ شامی حکومت مقید سیاسی قیدیوں کو رہا کرے، خاص طور پر عورتوں اور بچوں کو آزادی دی جائے۔ اِس کے علاوہ قومی اتحاد نے امن کانفرنس میں شام میں حکومت کی تبدیلی کو بھی اہم قرار دیا ہے۔

شامی اپوزیشن کے قومی اتحاد کی استنبول میں ہونے والی طویل میٹنگ کے مختلف حصے منظر ازبک کی جانب سے جاری کیے گئے ہیں۔ ازبک شامی اپوزیشن کے قومی اتحاد کے سربراہ احمد الجربا کے چیف آف اسٹاف ہیں۔ امریکا اور روس کی کوششوں سے امن کانفرنس میں اپوزیشن کے بڑے گروپ کی شرکت کا فیصلہ پہلی بار سامنے آیا ہے۔

استنبول میں شامی اپوزیشن کے قومی اتحاد کی میٹنگ دو روز سے جاری ہے۔ یہ میٹنگ آج بھی جاری رہے گی۔ ابھی یہ طے نہیں کہ بشار الاسد حکومت قومی اتحاد کی پیش کردہ شرائط کا جواب کس انداز میں دیتی ہے۔ اسی طرح روس اور امریکا کا رد عمل بھی سامنے آنا باقی ہے۔

شام میں اسد حکومت کے خلاف برسرپیکار اسلامی جہادی گروپ جنیوا امن کانفرنس کی مخالفت کرتے ہوئے کہتے ہیں کہ یہ ایک بے نتیجہ و بے فائدہ عمل ہے۔ اس کے علاوہ ان کا یہ بھی کہنا ہے کہ جو بھی اس کانفرنس میں شریک ہو گا وہ اس پر غداری کی فردِ جرم عائد کریں گے۔ پیر کے روز ہونے والی پیش رفت کے تحت یہ بھی طے کیا گیا کہ شام کے اندر اور باہر مسلح انقلابی گروپوں کے ساتھ بات چیت کے لیے ایک کمیٹی تشکیل دی جائے گی، جو ان پر جنیوا کانفرنس پر قومی اتحاد کے موقف کو واضح کر کے ان کی حمایت حاصل کرنے کی کوشش کرے گی۔

جنیوا میں شام بارے مجوزہ امن کانفرنس رواں مہینے کے تیسرے ہفتے میں ہونے والی تھی۔ ابھی چند دِن قبل شام کے لیے اقوام متحدہ اور عرب لیگ کے مشترکہ مندوب لخضر براہیمی نے عالمی طاقتوں کے نمائندوں سے ملاقاتیں کر کے کانفرنس کے مؤخر ہونے کا اعلان کیا تھا۔ براہیمی نے امن کوششوں میں شامی اپوزیشن کے اندر پیدا شدہ گروپوں کے اختلافات کو اہم ترین رکاوٹ قرار دیا ہے۔ اس کے جوب میں شامی اپوزیشن نے براہیمی کو غیر جانبدار رہنے کا مشورہ دیا تھا۔