شام میں غیرملکی سفارتی سرگرمیوں میں تیزی

جرمن وزارت خارجہ کا کہنا ہےکہ جرمن سفارت کار منگل کو دمشق میں حیات تحریر الشام (ایچ ٹی ایس) کے نمائندوں کے ساتھ اپنی پہلی بات چیت کر رہے ہیں۔ اس ملاقات کا مقصد شام میں عبوری حکومتی عمل اور اقلیتوں کے تحفظ جیسے موضوعات پر بات چیت ہے۔

جرمن وزارت خارجہ کے ایک ترجمان کے مطابق، ''دمشق میں سفارتی موجودگی کے امکانات بھی اس ملاقات میں طے کیے جا رہے ہیں۔‘‘

ان کا مزید کہنا تھاکہ برلن حکومت ایچ ٹی ایس پر نظر رکھے ہوئے ہے کیوں کہ اس گروہ کی جڑیں دہشت گرد گروہ القاعدہ سے جڑی ہیں۔
یہ بات اہم ہے کہ اس اسلام پسند باغی گروپ نے چند روز قبل اچانک شام کے مختلف بڑے شہریوں کے بعد دارالحکومت دمشق پر بھی قبضہ کر لیا تھا، جب کہ برسوں سے شام پر حکمرانی کرنے والے بشارالاسد ملک سے فرار ہو گئے تھے۔

فرانسیسی سفارتی مشن بھی متحرک

فرانس کا ایک سفارتی وفد منگل کو دمشق میں قائم فرانسیسی سفارت خانے پہنچا ہے۔ خبر رساں ادارے اے ایف پی کے مطابق، بشارالاسد کے اقتدار کے خاتمے کے بعد فرانسیسی سفارتکاروں کا دمشق کا یہ پہلا دورہ ہے۔ بتایا گیا ہے کہ یہ فرانسیسی سفارت کار برسوں سے بند سفارتی مشن  پہنچے۔ واضح رہے کہ آٹھ دسمبر کو باغی فورسز نے دمشق پر قبضہ کیا تھا۔

شامی امور سے متعلق خصوصی فرانسیسی مندوب ژوں فرانسوا گیوم نے منگل کو کہا  کہ ان کا ملک شامی عوام کے ساتھ کھڑا ہے۔ شام کے دورے کے دوران انہوں نے کہا کہ وہ شام میں اس عبوری دور میں موجودہ حکام کے ساتھ عملی رابطوں کے لیے پہنچے ہیں۔

ایرانی سفارتی سرگرمیاں

ایرانی وزارت خارجہ نے منگل کو کہا ہے کہ دمشق میں قائم اس کا سفارت خانہ حالات سازگار  ہونے پر دوبارہ کھل جائے گا۔ یہ بات اہم  ہے کہ ایران بشارالاسد حکومت کا سب سے اہم اتحادی رہا ہے اور بشارالاسد کے ملک سے فرار کے بعد شامی شہریوں  نے ایرانی سفارتی عمارت پر ہلا بول دیا تھا اور وہاں توڑ پھوڑ کی گئی تھی۔

ایرانی وزارت خارجہ کے ترجمان اسماعیل باقائی نے کہا، ''دمشق میں سفارت خانے کی دوبارہ کھولنے کی تیاریاں کی جا رہی ہیں، تاہم اس کے لیے سفارت خانے اور اس کے عملے کی حفاظت اور سلامتی کو یقینی بنایا جانا ہے۔‘‘

ان کا کہنا تھا کہ جوں ہی ''حالات بہتر‘‘ ہوئے ایران دمشق میں اپنا سفارتی مشن دوبارہ کھول دے گا، تاہم انہوں نے اس سلسلے میں کوئی تاریخ نہیں بتائی۔

یہ بات اہم ہے کہ شام میں 2011 میں جب بشارالاسد حکومت کے خلاف عوامی احتجاج اور پھر خانہ جنگی شروع ہوئی تو اس تمام عرصے میں ایران بشارالاسد حکومت کا اہم ترین اتحادی رہا۔ اس دوران ایران کی جانب سے بشارالاسد حکومت کی زبردست عسکری مدد کی جاتی رہی۔ یہ بات تاہم  اہم ہے کہ بشارالاسد کے ملک سے فرار  ہونے کے بعد ایران نے خود کو بشارالاسد سے قدرے دور کیا ہے اور دونوں ممالک کے درمیان تاریخی دوستی پر زور دیا ہے۔

ع ت/ ک م (روئٹرز، اے ایف پی)