رونالڈو کی واپسی، ’مقابلہ جاندار ہو گا‘

اٹھائیس مئی بروز ہفتہ میلان کا سان سیرو اسٹیڈیم کو دولہن کی طرح سجا دیا گیا ہے جبکہ شہر بھر میں ایک میلے کا سماں برقرار ہے۔ چمپئنز لیگ کے اس اہم فائنل میچ کو دیکھنے کے لیے نہ صرف اٹلی بلکہ دیگر یورپی ممالک کے شائقین بھی جوق درجوق میلان کا رخ کر رہے ہیں۔

چیمپئنز لیگ کا ٹائٹل ریکارڈ دس مرتبہ اپنے نام کرنے والا اہم یورپی کلب ریال میڈرڈ ایک مرتبہ پھر کامیابی کے لیے پرامید ہے۔ سن 1956 میں پہلی مرتبہ منعقد کیے جانے والے اس اہم یورپی چیمپئن شپ مقابلے کا ٹائٹل بھی ریال میڈرڈ نے اپنے نام کیا تھا۔

اسٹار پرتگیزی کھلاڑی کرسٹیانو رونالڈو فٹ ہو چکے ہیں اور وہ اس میچ میں اپنی ٹیم کی نمائندگی کریں گے۔ رونالڈ نے منگل کے دن پریکٹس سیشن کے بعد کہا تھا کہ وہ سو فیصد فٹ ہو چکے ہیں اور اس فائنل میچ میں اپنے شائقین کی توقعات پر پورا اترنے کی کوشش کریں گے۔

ریال کے کوچ زیڈان نے بھی امید ظاہر کی ہے کہ اسٹار کھلاڑی رونالڈو اس میچ میں اپنی پرفارمنس سے ٹیم کو گیارہویں مرتبہ یہ ٹائٹل جتوانے میں کامیاب ہو جائیں گے۔

زیڈان کا بطور کوچ یہ پہلا فائنل ہے، ’’رونالڈو مکمل فٹ ہو چکا ہے۔ وہ چیمپئنز لیگ کا فائنل کھیلے گا۔‘‘ فرانسیسی کھلاڑی زیڈان نے سن 2002 میں ریال میڈرڈ کی نمائندگی کرتے ہوئے چیمئنز لیگ کا فائنل جیتا تھا۔

دوسری طرف ’ایتلیٹیکو میڈرڈ‘ کی شاندار کامیابیوں کے باعث ایسے اندازے بھی لگائے جا رہے ہیں کہ یہ اپنے حریف کلب کو کڑا وقت دے گا۔ اس کلب نے حال ہی میں انتہائی عمدہ کارکردگی کا مظاہرہ کیا ہے۔

ارجنٹائن کے سابق کھلاڑی ڈیاگو سیمونے کی کوچنگ میں ایتلیٹیکو میڈرڈ کی کارکردگی میں واضح فرق دیکھا جا رہا ہے۔

ایتلیٹیکو میڈرڈ کے سٹار کھلاڑی انٹونیو گریزمان سیمونے کا اہم ہتھیار تصور کیے جا رہے ہیں۔ انہوں نے اس ٹورنامنٹ میں سات گول اسکور کیے ہیں اور اپنی بھرپور فارم میں ہیں۔ اسی طرح ٹورس اور فرنانڈو سے بھی توقعات وابستہ کی جا رہی ہیں کہ وہ ریال میڈرڈ کا مضبوط دفاع توڑنے میں کامیاب ہو سکتے ہیں۔

میلان میں چیمپئنز لیگ کا چوتھا فائنل منعقد کیا جا رہا ہے۔ آخری مرتبہ وہاں یہ فائنل 2001ء میں کھیلا گیا تھا، جس میں جرمن کلب بائرن میونخ نے ویلنسیا کو شکست دی تھی۔

آر اینڈ بی اسٹار ایلیسیا کیز آج شب اسٹیڈیم میں منعقد ہونے والی ایک تقریب میں براہ راست اپنے فن کا مظاہرہ کریں گی۔ مجموعی طور پر نو منٹ ڈورانیے کی اس تقریب میں چار سو رقاص بھی شرکت کریں گے۔