دہلی ایئر پورٹ ٹرمینل کا ایک حصہ منہدم: ایک ہلاک، چھ زخمی

بھارتی حکام کے مطابق اس ہوائی اڈے کی منتظم اتھارٹی نے ٹرمینل ایک سے تمام پروازوں کی روانگی کو عارضی طور پر معطل کر دیا ہے کیونکہ امدادی کارکن وہاں پھنسے ہوئے افراد کو نکالنے کے لیے اپنی کارروائیاں جاری رکھے ہوئے ہیں۔

نئی دہلی ایئر پورٹ کا ٹرمینل ون اندرون ملک پروازوں کے لیے استعمال ہوتا ہے۔

فائر سروس کنٹرول روم کا کہنا ہے کہ زخمیوں کو ایک مقامی ہسپتال میں داخل کرا دیا گیا ہے۔ ہوائی اڈے کی اتھارٹی کے ایک بیان میں کہا گیا ہے، ''آج صبح سے ہونے والی تیز بارش کی وجہ سے مسافروں کی روانگی والے ٹرمینل کا ایک حصہ صبح پانچ بجے کے قریب منہدم ہو گیا۔‘‘

نیوز ایجنسی پریس ٹرسٹ آف انڈیا نے بتایا ہے کہ اس ٹرمینل کی چھت کے علاوہ کچھ ستون بھی زمین بوس ہو گئے، جن سے اس ٹرمینل کے 'پک اپ اینڈ ڈراپ آف ایریا‘ میں کئی کاروں کو نقصان پہنچا۔

اس نیوز ایجنسی کے مطابق اس واقعے میں چھ افراد زخمی ہوئے اور ایک زخمی شخص کو ایک کار کے اندر سے ریسکیو کیا گیا۔

شہری ہوا بازی کے بھارتی وزیر کے رام موہن نے کہا ہے کہ امدادی کارکن موقع پر اپنا کام کر رہے ہیں۔ انہوں نے تمام ایئر لائنز کو مشورہ دیا کہ وہ اپنے تمام متاثرہ مسافروں کی مدد کریں۔

کے رام موہن نے سوشل میڈیا پلیٹ فارم ایکس پر اپنی ایک پوسٹ میں لکھا، ''ریسکیو آپریشن ابھی تک جاری ہے۔‘‘

ا ا / م م (اے پی)