بغداد: سلسلہ وار بم دھماکے، 42 افراد ہلاک

گزشتہ روز کے دھماکوں کے بعد عراق میں جاری خونریز تشدد اور دہشت گردی کے سلسلے میں رواں برس اپریل سے اب تک ہلاکتوں کی تعداد 2000 سے تجاوز کر گئی ہے۔

عراق میں حالیہ دھماکے ایک ایسے وقت میں کیے گئے ہیں جب کئی ہزار شیعہ مسلمان عراق شہر کربلا میں جمع ہیں۔ یہ اجتماع شیعوں کے امامِ غائب کی نویں صدی میں ہونے والی پیدائش کے حوالے سے منعقد کیا جا رہا ہے۔ اس موقع پر عراق میں سکیورٹی کے سخت انتظامات کیے گئے ہیں۔

پیر کی شب ہونے والے دھماکوں میں سے خونریز ترین بغداد کی شیعہ آبادی والے علاقے حسینیہ کے قریب ہونے والے دو بم دھماکے تھے جو ایک مارکیٹ کے قریب ایک منٹ سے کم وقفے کے دوران ہوئے۔ ان دھماکوں میں 10 افراد ہلاک جب کہ 30 سے زائد زخمی ہوئے۔

عراقی پولیس کے مطابق دوسرا دھماکا اس وقت ہوا جب لوگ پہلے دھماکے کے بعد زخمیوں کی مدد کے لیے وہاں جمع تھے۔ حسینیہ کے ایک تاجر بسیم حازم کے مطابق وہ عشاء کی نماز کی تیاریوں میں تھے جب انہوں نے زوردار دھماکے کی آواز سنی۔ وہ دیگر افراد کے ساتھ دھماکے کے مقام پر پہنچے تو اس دوران دوسرا اور زیادہ طاقتور دھماکا ہوگیا۔

قبل ازیں پولیس کی طرف سے بتایا گیا تھا کہ دو کار بم دھماکے بغداد کے مغربی علاقے جہاد میں ہوئے۔ چند منٹ کے وقفے سے ہونے والے ان دھماکوں میں نو افراد ہلاک جب کہ 21 زخمی ہوئے۔ اس کے علاوہ الشرطہ الربیعہ کے علاقے میں دکانوں کے قریب ہونے والے ایک کار بم دھماکےمیں چار افراد ہلاک جب کہ نو زخمی ہوئے۔

عراقی وزارت داخلہ کے ترجمان سعد مان ابراہیم کے مطابق القاعدہ سکیورٹی فورسز سے براہ راست تصادم سے بچتے ہوئے عام شہریوں کو نشانہ بنا رہی ہے: ’’مارکیٹوں جیسے آسان اہداف کو نشانہ بنا کر القاعدہ یہ پیغام دینا چاہتی ہے کہ وہ اب بھی متحرک ہے اور عراق میں کسی بھی مقام پر حملہ کرنے کی صلاحیت رکھتی ہے۔‘‘

بغداد کی پولیس کے مطابق شیعہ آبادی الکرادہ کے قریب ایک سپر مارکیٹ میں ہونے والے کار بم دھماکے میں پانچ افراد ہلاک جب کہ 16 زخمی ہوئے۔ غروب آفتاب کے فوری بعد النهروان کے علاقے کی مارکیٹ میں بھی کار بم دھماکا ہوا جس میں چار شہری ہلاک جب کہ 15 دیگر زخمی ہوئے۔

نیو بغداد کے علاقے کی مارکیٹ میں ہونے والے کار بم دھماکے میں تین افراد ہلاک اور 10 زخمی ہوئے۔ پولیس کے مطابق اسی علاقے میں چند منٹ کے وقفے سے ایک بس اسٹاپ کے قریب ہونے والے دوسرے دھماکے میں دو شہری ہلاک اور آٹھ دیگر زخمی ہوئے۔

aba/shs (AP)