آئندہ 20 برس میں جرمنی میں ہر تیسرا شخص تارک وطن ہو گا

مہاجرت سے متعلق ایک جرمن ماہر کا کہنا ہے کہ سال 2040ء تک جرمنی کی آبادی میں 35 فیصد شرح ایسے افراد کی ہو گی جو تارکین وطن کا پس منظر رکھتے ہوں گے۔

جرمنی کے روزگار سے متعلق تحقیق کے وفاقی ادارے (IAB) میں مائیگریشن ریسرچ ڈیپارٹمنٹ کے سربراہ ہیربرٹ بروئکر نے جرمن اخبار 'ویلٹ‘ سے گفتگو کرتے ہوئے کہا کہ جرمنی ''زیادہ متنوع ہو جائے گا۔‘‘

بروئکر کے مطابق، ''اس وقت تارکین وطن پس منظر رکھنے والے جرمن شہریوں کی تعداد ایک چوتھائی ہے۔ جبکہ آئندہ 20 برس کے دوران یہ تعداد کم سے کم 35 فیصد تک پہنچ جائے گی جبکہ یہ 40 فیصد سے بھی بڑھ سکتی ہے۔‘‘

ہیربرٹ بروئکر کے مطابق بڑے شہروں میں تارکین وطن پس منظر کے حامل شہریوں کی تعداد نسبتاﹰ زیادہ ہو گی: ''جو کچھ اب ہمیں بڑے شہروں میں نظر آتا ہے وہ مجموعی طور پر پورے ملک میں معمول کی بات ہو گی تاہم فرینکفرٹ جیسے بڑے شہروں میں یہ تعداد 65 سے 70 فیصد تک پہنچ جائے گی۔‘‘

مزید تارکین وطن کی ضرورت

جرمن معیشت دان کا کہنا ہے کہ جرمن معیشت کے استحکام کے لیے مختلف قومیتوں کی حامل آبادی انتہائی اہم ہو گی۔ IAB کے اعداد وشمار سے اندازہ ہوتا ہے کہ جرمنی کو 2060ء تک ہرسال چار لاکھ تارکین وطن کی ضرورت ہے تاکہ اس کی معیشت سست روی کا شکار نہ ہو۔

چیلنج تاہم یہ ہے کہ جرمنی ایسے لوگوں کو اپنی جانب متوجہ کرے جو اپنے شعبوں میں انتہائی مہارت رکھتے ہیں۔ بروئکر کے بقول جرمنی کو دیگر ممالک کی لیبر کی طرف بھی توجہ دینی پڑی گی کیونکہ جنوبی اور مشرقی یورپی ممالک سے آنے والے کارکنوں کی تعداد اب ناکافی ہو گی۔

گزشتہ ماہ شائع ہونے والی ایک تحقیق کے مطابق تارکین وطن کے ایسے بچے جو اپنی زندگی کے ابتدائی حصے میں ہی جرمن پاسپورٹ حاصل کرتے ہیں ان کے اعلیٰ تعلیم کی جانب بڑھنے کے امکانات زیادہ ہوتے ہیں۔

ڈی ڈبلیو کے ایڈیٹرز ہر صبح اپنی تازہ ترین خبریں اور چنیدہ رپورٹس اپنے پڑھنے والوں کو بھیجتے ہیں۔ آپ بھی یہاں کلک کر کے یہ نیوز لیٹر موصول کر سکتے ہیں۔

ا ب ا / ک م (ڈی پی اے، کے این اے)