2017ء: نئے سال میں یورپ کے دَس نئے شاندار عجائب گھر

23 جنوری کو جرمن شہر پوٹسڈام کے مرکزی علاقے میں ’میوزیم باربیرینی‘ کا افتتاح عمل میں آیا۔ اس شاندار عمارت کا نام اٹلی کے دارالحکومت روم میں واقع ایک خوبصورت محل ’پالازو باربیرینی‘ کے نام پر رکھا گیا ہے۔ اس میوزیم میں کلاسیکی دور سے لے کر دورِ حاضر تک کی مصوری کے نمونے دیکھے جا سکتے ہیں۔ افتتاحی نمائش مونے اور رینوا جیسے تاثریت پسند فنکاروں کے لیے مخصوص کی گئی ہے۔

جرمن دارالحکومت برلن کے اس نئے عجائب گھر کا نام ہے، ’میوزیم فار کنٹمپریری اَربن آرٹ‘ اور اِس کی بیرونی دیوار پر یہ رنگا رنگ فن پارے بنائے گئے ہیں۔ اس میوزیم کا افتتاح اس سال ستمبر میں ہو گا۔ یہ میوزیم ’کنیکٹ، کری ایٹ، کیئر‘ کے عنوان سے فنکاروں اور پبلک کو ایک جگہ اکٹھا کرنا چاہتا ہے۔ اب تک دو سو سے زائد مصور اس میوزیم کا حصہ بن چکے ہیں اور یہ بیرونی دیوار مسلسل نئی شکلیں اختیار کر رہی ہے۔

اقتصادی نظام کیسے کام کرتا ہے؟ اسٹاک ایکسچینج کا کاروبار کیسے شروع ہوا؟ اس طرح کے سوالات کے جوابات زیورخ کے فنانس میوزیم میں مل سکتے ہیں، جو اس سال جون کے اواخر سے اپنے دروازے کھول رہا ہے۔ اس میوزیم میں سرمایے کی منڈی اور اس سے جڑے دیگر گوناگوں معاملات کی وضاحت مل سکتی ہے۔ یہاں تاریخی ’سکیورٹی پیپرز‘ کا وہ ذخیرہ بھی محفوظ ہے، جو اب تک اولٹن (تصویر) میں تھا۔

جرمنی کے ہمسایہ ملک آسٹریا میں اس سال موسمِ خزاں میں ’ورلڈ میوزیم ویانا‘ کے نام سے ایک نئے عجائب گھر کا افتتاح ہو رہا ہے۔ اس کے چَودہ نمائشی ہال ایشیا اور شمالی امریکا سمیت دُنیا کے مختلف خطّوں کی کہانیاں سنائیں گے۔ اس میوزیم کا ذخیرہ نسلی جغرافیے سے متعلق دو لاکھ اَشیاء اور ایک لاکھ تاریخی تصاویر کے ساتھ ساتھ اشاعتی مواد کے ایک لاکھ چھیالیس ہزار نمونوں پر بھی مشتمل ہے۔

1936ء میں پیدا ہونے والے اور 2008ء میں انتقال کر جانے والے ایو سینٹ لاؤراں نے فیشن کی دنیا پر زبردست اثرات مرتب کیے ہیں۔ اُنہوں نے ایک بار کہا تھا کہ فیشن فن کا درجہ نہیں رکھتا لیکن اِسے ایک فنکار کی ضرورت ہے۔ وہ خود ایسے ہی ایک فنکار تھے۔ اُن کے تخلیق کردہ ڈیزائن اس سال اکتوبر میں فرانسیسی دارالحکومت پیرس اور مر اکش میں کھُلنے والے دو نئے میوزیمز میں دیکھے جا سکیں گے۔

ہسپانوی جزیرے لانساروٹ میں جنوری 2017ء سے ’مُوزیو اٹلانٹیکو‘ نامی میوزیم کا افتتاح عمل میں آچکا ہے۔ سطحِ آب کے نیچے بنائے جانے والے یورپ میں اپنی نوعیت کے اس پہلے عجائب گھر کی تصاویر گزشتہ سال ہی منظرِ عام پر آ گئی تھیں۔ اِس طرح کے تین سو سے زائد پُتلے جیسن ڈے کیئرس ٹیلر نامی فنکار نے بنائے ہیں، جنہیں شائقین غوطہ خوری کا لباس پہننے کے بعد سمندر میں اُتر کر دیکھ سکتے ہیں۔

کم ہی کوئی قوم ایسی ہو گی، جس کے بارے میں اتنی کہانیاں، تعصبات اور غلط تصورات موجود ہوں، جتنے کہ کسی زمانے میں اسکنڈے نیویا میں آباد وائی کنگز کے بارے میں پائے جاتے ہیں۔ سویڈن کے دارالحکومت سٹاک ہولم کے اس نئے عجائب گھر میں مرکزی اہمیت گیارہ منٹ کے اُس سفر کی ہے، جس میں شائقین 963 سال پیچھے جا کر دیکھ سکتے ہیں کہ اُس دور کی زندگی کیسی تھی۔

پولینڈ کے شہر گڈانسک کے اس میوزیم میں دیکھا جا سکے گا کہ کیسے پولینڈ کے عوام کو اپنے ملک پر جرمنوں اور روسیوں کے قبضے کے دوران مصائب کا سامنا کرنا پڑا۔ اس میوزیم کے حوالے سے کھڑا ہونے والا ایک سیاسی تنازعہ اس کے افتتاح میں تاخیر کا سبب بن رہا ہے۔ آج کل ملکی وزارتِ ثقافت کی طرف سے منظوری کا انتظار ہے، جس کے بعد اس سال یہ میوزیم اپنے دروازے عوام کے لیے کھول دے گا۔

یونان کے دارالحکومت ایتھنز کے اس میوزیم کی تعمیر بھی تنازعات سے خالی نہیں رہی۔ اس دوران اسے متعدد مالیاتی اور دفتر شاہی ر کاوٹوں کا سامنا رہا۔ اکتوبر 2016ء سے اس کا ایک حصہ عوام کے لیے کھولا جا چکا ہے، جہاں نمائشیں ہو رہی ہیں۔ اس سال موسمِ خزاں سے پوری نمائش دیکھی جا سکے گی۔

اور آخر میں ایک نظر لندن کی جانب: وہاں کا وکٹوریا البرٹ میوزیم اس سال سے نئی آب و تاب کے ساتھ نظر آئے گا۔ اس سال جولائی میں اس کے نئے استقبالیہ ہال کی تعمیر مکمل ہو جائے گی۔ گزشتہ ایک سو سال میں اس عمارت کے ڈھانچے میں یہ سب سے بڑی تبدیلی ہو گی۔ اس میوزیم کی سینسبری گیلری گیارہ سو مربع میٹر پر پھیلی ہوئی ہے اور یوں یہ برطانیہ کی رقبے کے لحاظ سے بڑی گیلریوں میں سے ایک ہے۔