یورو ہاک ڈرون: وزیر دفاع دباؤ میں

اس پوچھ گچھ کا مقصد دراصل یہ پتہ چلانا ہے کہ اتنے برسوں بعد اور اتنے پیسے خرچ کرنے کے بعد ہی کیوں یہ نتیجہ اخذ کیا گیا کہ جرمنی کی فضاؤں میں اس ڈرون کو پرواز کی اجازت نہیں ہے۔ بنیادی مقصد وزیر دفاع کے قصور وار ہونے یا نہ ہونے کا پتہ چلانا ہے۔

جرمنی میں پارلیمان کی تحقیقاتی کمیٹیاں ’اپوزیشن کا مؤثر ترین ہتھیار‘ تصور کی جاتی ہیں، جن میں وُزراء سے بھی کھلے عام اُن کے کیے کا حساب لیا جا سکتا ہے۔ یورو ہاک ڈرون کے معاملے پر جو ’جنگ‘ لڑی جا رہی ہے، وہ ایک اعتبار سے ستمبر میں مجوزہ عام انتخابات کے معاملے پر بھی لڑی جا رہی ہے۔ اسی لیے تو پارلیمان کی موسم گرما کی تعطیلات کے باوجود تحقیقاتی کمیٹی کے اجلاس تواتر کے ساتھ جاری رہے اور ایک مہینے میں آٹھ اجلاس منعقد ہوئے۔ ظاہر ہے، اپوزیشن کا مقصد وزیر دفاع کی ساکھ کو زیادہ سے زیادہ نقصان پہنچانا ہے۔ جواب میں حکومتی جماعتیں اس حملے کا دفاع کر رہی ہیں۔

وزیر دفاع کٹہرے میں

تحقیقاتی کمیٹیاں بھی ایک طرح سے عدالتی مقدمات کی طرح ہوتی ہیں کہ ان میں بھی شواہد پیش کیے جاتے ہیں اور گواہوں کے بیانات قلمبند کیے جاتے ہیں۔ اس تحقیقاتی کمیٹی کا کام یہ پتہ چلانا ہے کہ کن وجوہات کی بناء پر اس سال مئی میں بغیر پائلٹ والے جاسوس طیارے یورو ہاک کی تیاری پر کام روک دیا گیا۔ کہیں 600 ملین یورو خرچ کر دینے کے بعد کہا گیا کہ مستقبل قریب میں اس ڈرون طیارے کو جرمنی کی فضاؤں میں پرواز کی اجازت ملنا غیر حقیقت پسندانہ ہو گا۔ اگر اس سارے معاملے میں وزیر دفاع تھومس ڈے میزیئر کا قصور ثابت ہو گیا، جو کہ چانسلر انگیلا میرکل کے قریبی ساتھی ہیں، تو اس کے اثرات کی زَد میں پوری حکومت آئے گی۔

ایسے میں حکومت کی کوشش ہے کہ اپنی کابینہ کے رکن ڈے میزیئر کی بجائے اصل قصووار اپوزیشن کی صفوں میں تلاش کیا جائے۔ اس صورت میں قرعہ سوشل ڈیموکریٹک پارٹی ایس پی ڈی کے روڈولف شارپنگ کے نام نکلے گا، جو 1998ء سے لے کر 2002ء تک وزیر دفاع رہے تھے۔ تحقیقاتی کمیٹی میں حکومتی جماعت CDU کے نمائندے تھومس گروبل نے کہا:’’یورو ہاک کا منصوبہ SPD اور گرینز نے شروع کیا تھا۔‘‘

شارپنگ کو شروع ہی میں اس کمیٹی میں بلا لیا گیا تھا۔ تاہم اُنہوں نے اپنے جانشین کی طرف اشارہ کرتے ہوئے کہا کہ ’ایسا کیسے ہو سکتا ہے کہ کوئی وزیر برسوں تک ایک عہدے پر رہے اور اُسے کسی منصوبے کے آغاز میں کی گئی غلطیوں کا پتہ نہ چلے‘۔

شارپنگ نے ڈے میزیئر کے اس موقف کو بھی چیلنج کیا کہ اُن کے عملے نے اُنہیں کافی معلومات فراہم نہیں کی تھیں۔ شارپنگ کے مطابق وزیر دفاع کا فرض تھا کہ وہ اپنے عملے سے بار بار استفسار کرتے، جیسے کہ وہ یعنی شارپنگ کیا کرتے تھے۔ یوں اپوزیشن دباؤ بڑھاتے ہوئے یہ کہہ رہی ہے کہ سارا قصور ہی ڈے میزیئر کا ہے اور انہیں اپنے عہدے سے مستعفی ہو جانا چاہیے۔

وزیر دفاع نے ’پوری ذمے داری‘ نہیں نبھائی

اپوزیشن کی اہم ترین گواہ وفاقی محکمہء آڈٹ کی جانچ پڑتال کرنے والی خاتون اہلکار انگیلیکا باؤخ تھی، جنہوں نے الزام لگایا کہ وزارتِ دفاع نے صنعتی شعبے پر اندھا اعتماد کیا اور وزیر دفاع نے باقاعدگی کے ساتھ تمام معلومات حاصل کرنے کی ذمے داری نہیں نبھائی۔

اسٹیٹ سیکرٹری سٹیفان بیمل مانز نے وزیر دفاع کے حق میں بیان دیا اور اعتراف کیا کہ وہ وزیر دفاع کو بر وقت ڈرون کے سلسلے میں پیدا ہونے والے مسائل سے آگاہ نہیں کر سکے اور یہ کہ ’سارا قصور خود اُن کا ہے‘۔ جرمن فوج میں ساز و سامان کی خریداری کے دفتر کے صدر ہارالڈ شٹائن نے بھی اپنی گواہی میں یہ کہا کہ وزیر دفاع بر وقت اس منصوبے سے الگ ہوئے ہیں۔ اُنہوں نے کہا کہ اگر یہ منصوبہ ایک سال پہلے ہی ختم کر دیا جاتا تو فضا سے تصاویر لینے کا وہ نظام مکمل نہ ہو پاتا، جو آدھے سے زیادہ بجٹ کھا گیا ہے اور جسے اب ضرورت پڑنے پر دوسرے طیاروں میں بھی استعمال کیا جا سکتا ہے۔

اب دیکھنا یہ ہے کہ وزیر دفاع آج اپنے دفاع میں کیا کہتے ہیں۔ تحقیقاتی کمیٹی اپنی کارروائی مکمل کرنے کے بعد اپنی اختتامی رپورٹ تیار کرے گی لیکن وہ کوئی فیصلے کرنے کا اختیار نہیں رکھتی۔ نتائج اخذ کرنا خود وزیر دفاع کا یا پھر اُن کی چیف یعنی چانسلر انگیلا میرکل کا کام ہے، جو واضح طور پر کہہ چکی ہیں کہ وہ اپنے وزیر دفاع کے ساتھ ہیں۔ عام انتخابات سے کچھ ہی پہلے وہ مزید کسی دھچکے کی متحمل نہیں ہو سکتیں۔