کریمیا میں ایٹمی ہتھیاروں کی تنصیب ہمارا حق ہے، ماسکو

روسی دارالحکومت ماسکو سے ملنے والی نیوز ایجنسی روئٹرز کی رپورٹوں کے مطابق کریمیا میں ایٹمی ہتھیاروں کی تنصیب کے روسی حق سے متعلق یہ بات ملکی وزارت خارجہ کے ایک اعلیٰ اہلکار نے کہی۔ اس اہلکار نے تاہم ساتھ ہی اس بارے میں لاعلمی کا اظہار بھی کیا کہ آیا ماسکو واقعی ایسا کرنے کا ارادہ بھی رکھتا ہے۔

روئٹرز کے مطابق روسی خبر رساں ادارے انٹرفیکس نے بتایا کہ ماسکو میں وزارت خارجہ کے ہتھیاروں پر کنٹرول کے شعبے کے سربراہ میخائل اُولیانوف نے آج بدھ گیارہ مارچ کے روز کہا، ’’میں نہیں جانتا کہ آیا اس وقت کریمیا میں کوئی جوہری ہتھیار موجود ہیں۔ مجھے اس بارے میں کسی ممکنہ منصوبے کا بھی کوئی علم نہیں ہے۔ لیکن اصولی طور پر روس ایسا کر سکتا ہے۔‘‘

پوٹن کی دعوت پر میرکل کا انکار

ادھر جرمن دارالحکومت برلن سے ملنے والی رپورٹوں میں کہا گیا ہے کہ ملکی چانسلر انگیلا میرکل نو مئی کے روز دوسری عالمی جنگ کے خاتمے کی 70 ویں سالگرہ کے موقع پر روس میں ہونے والی مرکزی سرکاری تقریب میں حصہ نہیں لیں گی۔

انگیلا میرکل کو اس تقریب میں شرکت کی دعوت روسی صدر ولادیمیر پوٹن نے دی تھی، جس میں برلن میں حکومتی اہلکاروں کے مطابق جرمن سربراہ حکومت کے شریک نہ ہونے کی وجہ جرمنی اور روس کے مابین یوکرائن کے بحران کے باعث پائی جانے والی کشیدگی ہے۔

برلن میں ایک اعلیٰ حکومتی اہلکار نے بتایا، ’’یوکرائن میں پیش آنے والے واقعات کے تناظر میں یہ ناممکن ہے کہ چانسلر انگیلا میرکل ماسکو کے ریڈ اسکوائر میں ہونے والی روایتی فوجی پریڈ کی تقریب میں حصہ لیں۔‘‘ ساتھ ہی اس اہلکار نے یہ بھی کہا، ’’چانسلر میرکل ایک روز بعد روسی دارالحکومت میں نامعلوم فوجی کی یادگار پر پھول بہرحال چڑھائیں گی۔‘‘

یورپی یونین اور امریکا کی طرف سے روس پر الزام لگایا جاتا ہے کہ وہ بحران زدہ یوکرائن کے مشرقی حصے میں روس نواز علیحدگی پسند باغیوں کی مدد کر رہا ہے۔ ماسکو ان الزامات کی تردید کرتا ہے۔

روس ابھی بھی باغیوں کی مدد کر رہا ہے، اسٹولٹن برگ

اسی دوران مغربی دفاعی اتحاد نیٹو کے سیکرٹری جنرل ژینس اسٹولٹن برگ نے آج بدھ کے روز کہا کہ روس ابھی تک مشرقی یوکرائن میں ماسکو نواز باغیوں کو تربیت اور ہتھیار فراہم کر رہا ہے۔

اسٹولٹن برگ نے مطالبہ کیا کہ ماسکو کو جنگ بندی معاہدے کا احترام کرتے ہوئے خود کو یوکرائن کے تنازعے سے مکمل طور پر نکال لینا چاہیے۔

مغربی دفاعی اتحاد کے سربراہ نے بیلجیم میں ایک تقریب کے موقع پر صحافیوں کو بتایا، ’’ہم روس سے یہ مطالبہ کرتے ہیں کہ وہ مشرقی یوکرائن سے اپنی تمام فورسز واپس بلا لے اور جنگ بندی سے متعلق مِنسک معاہدے کا احترام کرے۔‘‘