فلسطين اور اسرائيل عارضی جنگ بندی پر متفق

نيوز ايجنسی اے ايف پی کی مصری دارالحکومت قاہرہ سے موصولہ رپورٹوں کے مطابق اسرائيل اور فلسطين کے مابين جنگ بندی کی يہ تازہ ڈيل قاہرہ ميں مذاکرات کے بعد عمل ميں آئی۔ مذاکرات ميں ميزبان ملک کے اور فلسطينی مذاکرات کاروں نے شرکت کی، جس ميں حماس کے نمائندے بھی شامل تھے۔

اگرچہ اسرائيل کی جانب سے تاحال کوئی وفد قاہرہ نہيں بھيجا گيا ہے تاہم پير اور منگل کی درميانی شب اسرائيل کی طرف سے اعلان کر ديا گيا ہے کہ فائر بندی کے ليے مصر کی طرف سے پيش کردہ منصوبہ تسليم کر ليا گيا ہے۔ اپنی شناخت مخفی رکھنے کی شرط پر ايک اسرائيلی اہلکار نے بتايا، ’’ہم مصر کی پيشکش پر عمل در آمد شروع کرنے پر اتفاق کرتے ہيں۔‘‘ اسرائيلی ذرائع ابلاغ پر نشر کردہ رپورٹوں کے مطابق جنگ بندی پر عمل در آمد کا فيصلہ وزير اعظم بينجمن نيتن ياہو کی سکيورٹی کابينہ کے اجلاس میں ليا گيا۔

اسرائيل کے بعد فلسطينی تنظيم حماس کی جانب سے بھی اعلان کر ديا گيا ہے کہ وہ بہتر گھنٹوں پر مشتمل اس عارضی فائر بندی ڈيل پر عمل در آمد کے ليے راضی ہے۔ يہ اعلان حماس کے ترجمان سميع ابو زہری نے کيا۔ قبل ازيں قاہرہ ميں فلسطينی وفد کے سربراہ عزام الاحمد نے کہا تھا، ’’فلسطينی جنگ بندی کے ليے مصری منصوبے پر متفق ہو گئے ہيں۔‘‘

يہ امر اہم ہے کہ گزشتہ ہفتے اسی طرز کی ايک بہتر گھنٹوں کی فائر بندی ڈيل ناکام ہو گئی تھی، جس کے ليے فريقين نے ايک دوسرے کو قصور وار ٹھہرايا تھا۔

حماس کے عسکری ونگ کے جنگجوؤں کی جانب سے اسرائيل کی جانب راکٹ حملوں کے جواب ميں اسرائيل نے آٹھ جولائی کو غزہ پٹی ميں باقاعدہ کارروائی کا آغاز کيا تھا، جس ميں اب تک 1,834 فلسطينی ہلاک ہو چکے ہيں، جن ميں بھاری اکثريت شہريوں کی ہے۔ اس دوران اسرائيل کے بھی چونسٹھ فوجی اور تین سویلین مارے جا چکے ہيں۔

مشرق وسطی بحران، اقوام متحدہ کی جنرل اسمبلی کا اجلاس طلب

دريں اثناء عرب ممالک کی درخواست پر اقوام متحدہ کی 193 رکنی جنرل اسمبلی کا اجلاس طلب کر ليا گيا ہے۔ يہ اجلاس بدھ چھ اگست کے روز امريکی شہر نيو يارک ميں اقوام متحدہ کے ہيڈ کوارٹر ميں ہو گا اور اس ميں اعلی اہلکار اس بحران پر ايک رپورٹ پيش کريں گے۔ رکن ممالک کے سفيروں کو اقوام متحدہ کے اعلی اہلکار بريفنگ ديں گے۔ ان اہلکاروں ميں ادارے کی انسانی حقوق سے متعلق کمشنر ناوی پلے بھی شامل ہوں گی، جو يہ کہہ چکی ہيں کہ غزہ ميں اسرائيلی کارروائی جنگی جرائم کے زمرے ميں آ سکتی ہے۔ اردن کی طرف سے اقوام متحدہ کی سلامتی کونسل ميں ايک قرارداد کا مسودہ پيش کيا جا چکا ہے، جس ميں فوری جنگ بندی اور غزہ پٹی سے اسرائيل کے پيچھے ہٹنے کا مطالبہ کيا گيا ہے تاہم تاحال يہ مسودہ بحث و مباحثے کے ليے پيش نہيں کيا گيا ہے۔ پندرہ رکنی سلامتی کونسل ستائيس جولائی کو ایک بیان پر متفق ہو چکی ہے کہ غزہ ميں جنگ بندی کی جائے اور بحران کے حل کے ليے مصر کی ثالثی کوششوں کی حمايت کی جائے۔