دوعراقی شہروں پر عسکریت پسندوں کا جزوی قبضہ

عراقی وزارت خارجہ نے نیوز ایجنسی اے ایف پی سے گفتگو کرتے ہوئے بتایا ہے کہ فلوجہ شہر کے تقریبا آدھے حصے پر القاعدہ سے منسلک عسکریت پسند قبضہ کر چکے ہیں جبکہ دیگر آدھے حصے پر مسلح قبائلیوں کا کنٹرول ہے۔ ایک عینی شاہد کے مطابق عسکریت پسندوں نے فلوجہ کے وسط اور جنوب میں چیک پوسٹیں قائم کر دی ہیں اور ہر چیک پوسٹ پر چھ سے سات مسلح افراد موجود ہیں۔

صوبہ انبار کے ہی دوسرے شہر رمادی کی صورتحال بھی اسی طرح کی ہے۔

نیوز ایجنسی اے ایف پی کے ایک صحافی نے بتایا ہے کہ رمادی کے مشرقی حصے میں درجنوں ایسی گاڑیوں پر گشت کیا جا رہا، جن پر مسلح افراد سوار ہیں۔ اس صحافی کے مطابق ان عسکریت پسندوں کا تعلق القاعدہ سے منسلک عسکری تنظیم ’اسلامک اسٹیٹ ان عراق‘ سے ہے۔ ان عسکریت پسندوں نے سیاہ رنگ کے جھنڈے بھی اٹھا رکھے ہیں، جن پر اسلامی نعرے درج ہیں۔

حکومت کے لیے چیلنج

دریں اثناء عراقی وزیر اعظم نوری المالکی نے صوبہ انبار کے شہروں سے فوج کی واپسی کا فیصلہ واپس لے لیا ہے۔ گزشتہ روز انہوں نے اس صوبے میں تعینات فوجیوں کو واپس بلانے کا اعلان کرتے ہوئے کہا تھا کہ جلد ہی سکیورٹی کی ذمہ داریاں مقامی پولیس کے حوالے کر دی جائیں گی۔ آج عراقی وزیر اعظم نے دوبارہ اس صوبے میں فوجی دستے تعینات رکھنے کا حکم جاری کیا ہے تاکہ سنی مسلمانوں کی اکثریت والے اس صوبے میں عسکریت پسند گروپوں کو کنٹرول کیا جا سکے۔ عراق کے سرکاری ٹیلی وژن کے مطابق وہاں سے فوج کو واپس بلانے کی بجائے مزید فوجی تعینات کیے جائیں گے۔

صوبہ انبار کے شہر رمادی میں حکومتی فورسز اور عسکریت پسندوں کے مابین تازہ جھڑپوں کا آغاز ایک ہفتہ پہلے اس وقت ہوا تھا، جب فوج نے رمادی میں سُنی مسلمانوں کے ایک احتجاجی کیمپ کو اُکھاڑ پھینکا تھا۔ صوبے کے سُنی مسلمانوں نے گزشتہ ایک سال سے یہ احتجاجی کیمپ لگا رکھا تھا۔ اس کیمپ کے خاتمے کو بغداد حکومت کی فتح سے تعبیر کیا گیا تھا۔ اطلاعات کے مطابق رمادی کے مغرب میں اب بھی وقفے وقفے سے سکیورٹی فورسز اور عسکریت پسندوں کے مابین جھڑپیں جاری ہیں۔

تجزیہ کاروں کے مطابق نوری المالکی کو احتجاجی کیمپ کے خاتمے کی بھاری قیمت ادا کرنا پڑی ہے۔ اس حکومتی اقدام سے نہ صرف سکیورٹی کے حالات بلکہ سیاسی سطح پر بھی صورتحال خراب ہوئی ہے۔ احتجاجی کیمپ کے خلاف فوجی آپریشن کے بعد 44 اراکین پارلیمان نے مستعفی ہونے کی دھمکی دی تھی۔ ان کا مطالبہ تھا کہ صوبہ انبار سے فوج کا انخلاء کیا جائے اور اسی دباؤ کے تحت ملکی وزیراعظم نے فوج واپس بلانے کا اعلان کیا تھا۔