’جہادیوں‘ سے نمٹنے کے لیے کثیر الجہتی کوششیں

شام میں امریکا اور اس کے اتحادیوں کی طرف سے کیے جانے والے تازہ فضائی حملوں کے نتیجے میں اسلامک اسٹیٹ اور دیگر شدت پسند گروہوں کے مزید بیس جنگجو ہلاک ہو گئے ہیں۔ سریئن آبزرویٹری فار ہیومن رائٹس نے جمعرات کو بتایا کہ یہ حملے شام میں تیل کی ان تنصیبات پر کیے گئے، جہاں عسکریت پسندوں نے ٹھکانے بنا رکھے ہیں۔

ان فضائی حملوں کے علاوہ شدت پسندوں کو کمزور بنانے کے لیے عالمی سطح پر کئی اقدامات اٹھانے کا فیصلہ بھی کیا گیا ہے۔ امریکی صدر باراک اوباما کی انتظامیہ نے جنگجوؤں کی بھرتی، چندہ جمع کرنے اور ان کی انتظامی مدد کے علاوہ ان کی نقل و حمل کو محدود بنانے کے لیے بھی اہم فیصلے کیے ہیں۔ قبل ازیں بروز بدھ کو اقوام متحدہ کے تمام ممبران ممالک کی طرف سے منظور کی گئی ایک قرارداد میں بھی ایسے ہی فیصلے کرنے پر زور دیا گیا تھا۔

اقوام متحدہ کے سیکرٹری جنرل بان کی مون نے کہا، ’’ان دہشت گردوں کو شکست دینے کے لیے بین الاقوامی اتحاد اور کثیر الجہتی حکمت عملی اختیار کرنے کی ضرورت ہے۔ میزائل سے جنگجو ہلاک تو ہو سکتے ہیں لیکن اچھے طرز حکمرانی سے دہشت گردی کا خاتمہ ہوتا ہے۔‘‘ انہوں نے اصرار کیا کہ ایسے حالات پیدا کرنے کی ضرورت ہے، جس سے ان پرتشدد انتہا پسندوں کو پنپنے سے روکا جا سکے۔

امریکی صدر باراک اوباما نے اقوام متحدہ کی اس قرار داد پرتبصرہ کرتے ہوئے کہا، ’’ان دہشت گردوں کو شام میں پہنچنے اور دوبارہ ہمارے ممالک میں داخل ہونے سے روکنا، ہماری حکمت عملی کا ایک اہم نکتہ ہے۔ اس تاریخی قرار داد کی منظوری، اس چیلنج سے نبرد آزما ہونے کے عزم کا اظہار ہے۔‘‘

امریکی صدر نے البتہ یہ بھی کہا کہ صرف یہ قرارداد ہی کافی نہیں ہے۔ اوباما کے بقول وعدے، کاغذی کارروائی، اچھی نیت اور تقریریں کسی ایک دہشت گرد کو بھی نہیں روک سکتے ہیں، اس لیے جو عہد کیا گیا ہے اسے اعمال سے بھی ثابت کرنا ہوگا۔

عراق و شام میں جہادیوں پر جاری امریکا اور اس کے عرب اتحادیوں کے حملوں میں ابھی تک برطانیہ شریک نہیں ہوا ہے تاہم برطانوی وزیر اعظم ڈیوڈ کیمرون کا کہنا ہے کہ ان کی پارلیمان جمعے کے دن ایک خصوصی سیشن میں اس مہم میں شامل ہونے پر رائے شماری کرے گی۔ ڈیوڈ کمیرون کا کہنا ہے، ’’ہمیں انتہا پسندی کی زہریلی نظریاتی اساس کو شکست دینا ہے، جو دہشت گردانہ خطرات کی ایک اہم وجہ ہے۔ یقینی طور پر انتہا پسندی اور تشدد کو فروغ دینے والی متعدد ویب سائٹس اور مبلغ موجود ہیں، ہمیں ان کا مقابلہ بھی کرنا ہے۔‘‘

انہوں نے مزید کہا کہ انتہا پسندی کے نظریات کو مات دینے کے لیے نہ صرف پرتشدد بلکہ انتہا پسندی کی تمام اقسام کو جڑ سے اکھاڑ پھینکنا ہو گا۔ انہوں نے ایرانی صدر حسن روحانی سے تاریخی ملاقات کے بعد یہ بھی کہ اسلامک اسٹیٹ کے خلاف جاری عالمی جنگ میں تہران حکومت بھی اہم کردار ادا کر سکتی ہے۔