جرمنی: آج سے سالانہ ’بائے روتھ فيسٹول‘ کا آغاز

بائے روتھ فيسٹول ميں اس سال ماضی کے نامور جرمن کمپوزر رچرڈ واگنر کی پيدائش کے دو سو سال مکمل ہونے کے سلسلے ميں تقريبات کا انعقاد ہو رہا ہے۔ واگنر سن 1813 ميں پيدا ہوئے تھے اور ان کی وفات 1883ء ميں ہوئی تھے۔ انہيں اوپیرا کے ليے موسيقی کمپوز کرنے کے حوالے سے جانا اور مانا جاتا ہے۔

جرمن چانسلر انگيلا ميرکل اپنے خاوند يوآخم زاؤور کے ساتھ اس تہوار ميں قريب ہر برس ہی شرکت کرتی ہيں۔ ان کے علاوہ ملک کے کئی ديگر اہم سياستدان اور فلمی دنيا سے تعلق رکھنے والی کئی شخصيات بھی بائے روتھ فيسٹول ميں شرکت کرتی ہيں۔

تہوار کی سربراہان، واگنر کی دو پوتيوں نے واگنر کی پيدائش کے دو سو سال مکمل ہونے کے سلسلے ميں ان کے مشہور اوپیرا ’رنگ سائيکل‘ کے انعقاد کا انتظام کيا ہے۔ يہ چار اوپیرا ڈرامے جرمنی کی تاريخ کے کليتی خداؤں اور ہيروز پر مبنی ہيں اور ان کا شمار واگنر کے اہم ترين شاہکاروں ميں ہوتا ہے۔

جرمن نيوز ايجنسی ڈی پی اے کے مطابق رنگ سائيکل ميں مجموعی طور پر چار پرفارمنس ہوں گی اور اس سلسلے ميں ’داس رائن گولڈ‘ نامی پہلی اسٹيج پرفارمنس جمعہ چھبيس جولائی سے شروع ہو رہی ہے۔ برلن سے تعلق رکھنے والے تھيٹر کے ہدايتکار فرانک کاسٹروف اس پرفارمنس کی ڈائريکشن کے فرائض انجام ديں گے اور اطلاعات کے مطابق وہ واگنر کے رنگ سائيکل کو ايک نئے زاويے کے ساتھ پيش کريں گے۔ کاسٹروف کے قريبی ذرائع کے بقول وہ ’داس رائن گولڈ‘ ميں تيل کی صنعت پر توجہ مرکوز کريں گے کيونکہ آج کل تيل سونے کی سی ہی حيثيت رکھتا ہے۔ ناقدين اور رچرڈ واگنر کے کام کے مداح اس مختلف زاويے والی پرفارمنس کا بے صبری سے انتظار کر رہے ہوں گے۔

رنگ سائيکل کو سب سے پہلے 1876ء ميں جرمن رياست باویريا کے شہر بائے روتھ ميں پيش کيا گيا تھا، جہاں واگنر نے اپنا تھيٹر اور اپنی رہائش گاہ ’وائن فريڈ‘ بھی تعمير کرائی تھی۔ اس سال بائيس مئی کو لائپزگ اور بيروت ميں رچرڈ واگنر کی دو سو ويں سالگرہ کی سرکاری تقريبات کا انعقاد کيا گيا تھا۔

بائے روتھ فيسٹول ہر سال اوپیرا کے نامور جرمن کمپوزر رچرڈ واگنر کی ياد ميں منعقد کيا جاتا ہے۔