بھارت کی خواتین کھلاڑی ساڑھی نہیں پینٹ پہنیں گی

نیوز ایجنسی اے ایف پی کی رپورٹ کے مطابق بھارت کی بہت سی نوجوان خواتین ایتھلیٹس  نے سیاہی مائل نیلی جیکٹوں اور پینٹوں کے یونیفارم پر پسندیدگی کا اظہار کیا ہے۔ بھارت کے ’ایتھلیٹس کمیشن‘ کی جانب سے اس مرتبہ خواتین کے یونیفارم کو تبدیل کرنے کا فیصلہ کیا گیا ہے۔

بھارت کی چند نامور  خواتین کھلاڑیوں  نے تاہم اس فیصلے پر تحفظات کا اظہار کیا ہے۔ بیڈمنٹن کی کھلاڑی پی وی سندھو اورکُشتی کی کھلاڑی ساکھشی ملک جو دونوں اولمپک کھیلوں میں ایوارڈ یافتہ ہیں، کا کہنا ہے کہ انہیں ساڑھی کا یونیفارم زیادہ پسند تھا۔ ساکھشی ملک کے بقول ،’’ ہمیں بہت زیادہ خوشی ہوتی ہے اور ہم فخر محسوس کرتی ہیں جب ہم  کھیلوں کی افتتاحی تقریب میں اپنے ملک کا قومی لباس یعنی ساڑھی پہنتے ہیں۔‘‘

دوسری جانب ان نوجوان کھلاڑیوں کی رائے میں نیا یونیفارم بھارت کے لیے اس بین الاقوامی کھیلوں کی تقریب میں ایک مثبت تبدیلی ثابت ہو گا۔ جنوبی ایشائی ملک کی ہاکی ٹیم کی 23 سالہ کپتان رانی رامپل کا کہنا ہے،’’ مجھے نیا یونیفارم بہت زیادہ پسند آیا ہے، تبدیلی اچھی لگتی ہے۔‘‘

بھارت کی خواتین کھلاڑیوں نے اپنے ملک کا نام روشن کر دیا

ثانیہ مرزا نے ومبلڈن ڈبلز جیت کر تاریخ رقم کر دی

بھارتی خواتین کھلاڑیوں کے یونیفارم کو انڈیا میں کپڑوں کی نامور کمپنی ’ریمنڈ‘ نے ڈیزائن کیا ہے۔ اس کمپنی کے ترجمان روہت کھنہ کا کہنا ہے،’’ یقینی طور پر بھارت کا روایتی لباس ساڑھی ہی ہے لیکن خواتین کھلاڑی کہتی ہیں کہ ساڑھی پہننا ایک مشکل عمل ہے اسی لیے یہ نیا یوینیفارم تیار کیا گیا۔‘‘