بنڈس لیگا: ڈورٹمنڈ نے ہیمبرگ کو شکست دے دی

جمعے کے روز کھیلے گئے اس میچ میں ڈورٹمنڈ کی طرف سے دونوں گول کھیل کے دوسرے ہاف میں کئے گئے۔ ڈورٹمنڈ کی طرف سے پہلا گول جاپان سے تعلق رکھنے والے کھلاڑی شنجی کاگاوا نے کیا جبکہ دوسرا گول لوکاس باریوز نے کیا۔ اس میچ کو دیکھنے کے لئے اسٹیڈیم میں موجود تماشائیوں کی تعداد 80 ہزار سے زائد تھی۔

اس فتح کے ساتھ ڈورٹمنڈ کی ٹیم اب فیڈرل لیگ میں سات پوائنٹس کے واضح فرق سے دوسرے نمبر کی ٹیم مائنز سے بہت آگے ہے۔ میچ میں جاری ڈیڈ لاک کا خاتمہ کھیل کے دوسرے ہاف کے آغاز کے چار منٹ بعد جاپانی مِڈ فیلڈر کاگاوا نے ڈورٹمنڈ کو ایک گول کی برتری دلا کر کیا۔ کھیل کے 70 ویں منٹ میں باریوز نے گول کر کے ڈورٹمنڈ کی برتری کو اور بھی مستحکم کر دیا جو کھیل کے اختتام تک قائم رہی۔

فیڈرل لیگ میں باریوز کا مجموعی طور پر یہ ساتواں گول تھا جبکہ اس میچ میں گول کر کے کاگووا نے اپنے مجموعی گولوں کی تعداد چھ کر لی۔ ڈورٹمنڈ کی ٹیم نے اب تک کھیلے گئے 12 میچوں میں سے دس میں کامیابی حاصل کی ہے اور مجموعی طور پر اس کے پوائنٹس کی تعداد 31 ہو گئی ہے۔

لیگ میں اب تک دوسرے نمبر کی ٹیم مائنز کے 24 پوائنٹس ہیں اور وہ آج ہفتہ کو اپنا میچ ہینوور کے خلاف کھیل رہی ہے۔ لیگ میں تیسرے نمبر کی ٹیم لیورکوزن آج ہی ایک میچ میں سینٹ پاؤلی کی ٹیم کا مقابلہ کرے گی۔ بنڈس لیگا کی دفاعی چیمپیئن بائرن میونخ کی ٹیم اس وقت نویں پوزیشن پر ہے اور اس کا میچ اتوار کے روز لیگ میں چھٹے نمبر کی ٹیم نیورمبرگ سے ہو گا۔

آج ہفتے کے روز کھیلے جانے والے دیگر میچوں میں کائزرز لاؤٹرن کی ٹیم شٹٹ گارٹ کے مد مقابل آ رہی ہے۔ وولفس برگ کی ٹیم کا میچ شالکے سے ہے جبکہ بریمن کی ٹیم فرینکفرٹ کا سامنا کر رہی ہے۔ اتوار کے روز ہوفن ہائم کا مقابلہ فرائی برگ سے جبکہ بائرن میونخ کا میچ نیورمبرگ سے ہو رہا ہے۔

رپورٹ: عاطف توقیر

ادارت: مقبول ملک