جواد ظریف پاکستان میں، فوجی سربراہ سے بھی ملیں گے

پاکستانی وزارت خارجہ کا کہنا ہے کہ جواد ظریف اپنے اس دورے میں اپنے پاکستانی ہم منصب شاہ محمود قریشی کے ساتھ ملاقات کریں گے، اس کے علاوہ بتایا گیا ہے کہ وہ نئے وزیراعظم عمران خان سے بھی ملیں گے جب کہ ان کی ملاقات پاکستانی فوجی سربراہ جنرل قمر جاوید باجوہ سے بھی ہو گی۔

پاکستانی اخبار ڈان نے اپنے ایک ٹوئٹر پیغام میں لکھا ہے کہ جواد ظریف پاکستان میں نئی حکومت کے قیام کے بعد وہ پہلے غیرملکی وزیرخارجہ ہیں، جو نئی پاکستانی قیادت سے ملنے پہنچے ہیں۔

آج ہی جاپان کے وزیرمملکت برائے خارجہ امور بھی اسلام آباد پہنچ رہے ہیں، جہاں وہ پاکستانی وزیرخارجہ سے ملاقات کریں گے۔

بدھ کے روز امریکا کی جانب سے تصدیق کی گئی تھی کہ امریکی وزیرخارجہ مائیک پومپیو اور جوائنٹ چیفس آف اسٹاف کمیٹی کے چیئرمین جنرل جوزت ڈنفورڈ اگلے ہفتے پاکستان پہنچیں گے اور نومنتخب وزیراعظم عمران خان سے ملیں گے۔