امریکی بیڑا خلیج کی طرف روانہ

امریکی وزیر دفاع چک ہیگل کے مطابق بحری بیڑے کو خلیج کی جانب بھیجنے کا اقدام سُنی عسکریت پسندوں کی تیزی سے دارالحکومت بغداد کی جانب پیش قدمی کے جواب میں اٹھایا گیا ہے۔ اس جہاز پر درجنوں لڑاکا طیارے موجود ہیں۔ اگر صدر اوباما نے عراق میں مداخلت کا فیصلہ کیا تو فوری طور پر اس بیڑے کے ذریعےکارروائی کی جا سکے گی۔

خیال رہے کہ جمعے کے روز امریکی صدر باراک اوباما نے عراق میں امریکی افواج کی تعیناتی کے امکان کو رد کر دیا تھا۔ ان کا کہنا تھا کہ عراقی حکومت کی عسکری مدد کے لیے اس بات کے علاوہ تمام امور پر غور کیا جا رہا ہے۔ اوباما کا یہ بھی کہنا تھا کہ اس مسئلے کے مستقل حل کے لیے عراقی رہنماؤں کو فرقہ واریت کے خاتمے کے لیے سیاسی مفاہمت کی راہ اپنانا ہو گی۔ ان کے مطابق امریکی نیشنل سکیورٹی ٹیم اگلے چند روز میں اس حوالے سے ایک منصوبہ تیار کر لے گی۔

دوسری جانب عراقی فوج نے دعویٰ کیا ہے کہ آئی ایس آئی ایل کے خلاف جوابی کارروائی کرتے ہوئے سُنی عسکریت پسندوں کی پیش قدمی کو سُست رو بنا دیا گیا ہے۔ عراقی حکومت کو یہ کامیابی ایران کے اس اعلان کے ایک روز بعد ملی ہے، جس میں دولت اسلامیہ فی العراق والشام (آئی ایس آئی ایل) اور دیگر عسکری گروپوں کے خلاف مدد فراہم کرنے کا وعدہ کیا گیا تھا۔

امریکی وزیر خارجہ جان کیری نے کہا ہے کہ امریکی مدد صرف اسی وقت کارگر ثابت ہوگی جب عراقی رہنما خود متحد ہوں گے۔

ایران کے صدر حسن روحانی نے چند روز قبل تہران میں ایک نیوز کانفرنس سے خطاب میں یہ عندیہ دیا تھا کہ اگر عراقی حکومت نے ان کے ملک سے درخواست کی تو سنی شدت پسندوں سے نمٹنے کے لیے ایران عراق کی مدد کرے گا۔ انہوں نے اس عزم کا بھی اظہار کیا کہ ایران اپنی سرحدوں کی حفاظت کے لیے تمام اقدامات کر رہا ہے۔

سنی شدت پسند گروہ اسلامک اسٹیٹ اِن عراق اینڈ شام نے گزشتہ چند روز میں شمالی عراق کے متعدد اہم شہروں پر قبضہ کر لیا تھا، تاہم جمعے اور ہفتے کی درمیانی شب پولیس اور مقامی رہائشیوں نے ایک اور علاقے سے بھی ان شدت پسندوں کو مار بھگایا۔

ہفتے کوعراقی وزیراعظم نوری المالکی نے سمارا کے علاقے میں اہم شیعہ درگاہ ’’العسکری‘‘ کا دورہ کیا۔ شیعہ مسلک سے تعلق رکھنے والے وزیراعظم نوری المالکی کے مطابق ملکی پارلیمان نے انہیں سکیورٹی فورسز کا کمانڈر اِن چیف مقرر کرتے ہوئے لامحدود اختیارات دے دیے ہیں، تاکہ وہ شدت پسندوں سے نمٹ سکیں۔