Zëdhënësi i Kremlinit e quan sulmin ndaj Ukrainës "luftë"

Më shumë se dy vjet pas fillimit të luftës kundër Ukrainës, zëdhënësi i Kremlinit Dmitri Peskov ka hequr dorë nga termi banalizues "operacion special ushtarak".

Në një intervistë për të përjavshmen ruse Argumenty i Fakty, Peskov deklaroi: "Ne jemi në gjendje lufte. Po, ai filloi si një operacion ushtarak special, por sapo u shfaq klika, kur perëndimi kolektiv u përfshi si pjesëtar në anën e Ukrainës, u bë luftë për ne”. Ai është i bindur për këtë, "dhe të gjithë duhet ta kuptojnë për t'u mobilizuar personalisht," shtoi Peskov.

"Duhet të çlirojmë plotësisht territoret e reja"

Zëdhënësi i Kremlinit shtoi se Rusia nuk mund të lejojë që në kufijtë e saj të ekzistojë një shtet që është treguar i gatshëm të përdorë çdo metodë për të fituar kontrollin e Krimesë. "Rusia duhet të çlirojë plotësisht territoret e saj të reja për të garantuar sigurinë e banorëve të saj."

Në një konferencë shtypi, Peskovi më vonë sqaroi se operacionet luftarake mbetën një "operacion special" nga pikëpamja ligjore, por në fakt ishin një luftë.

Katër rajone dhe Krimea nën kontrollin rus

Presidenti rus Vladimir Putin urdhëroi sulmin ndaj Ukrainës më 24 shkurt 2022. Ai foli për një "operacion special ushtarak". Ushtria ruse më pas pushtoi zona të mëdha të vendit fqinj, por nuk mundi të merrte kryeqytetin, Kiev, siç e kishte planifikuar. Më vonë, trupat ukrainase arritën të largonin forcat pushtuese nga disa pjesë të vendit, edhe me ndihmën e furnizimeve me armë perëndimore.

Megjithatë, Rusia vazhdon të mbajë të pushtuar pothuajse një të pestën e Ukrainës, duke përfshirë Krimenë, të cilën e aneksoi në vitin 2014. Këto janë katër rajonet e Luhanskut, Donetskut, Zaporizhias dhe Khersoni, në Ukrainën lindore dhe jugore, të cilat trupat ruse të paktën i kontrollojnë pjesërisht dhe të cilat u aneksuan në shtator 2022.

Fjala "luftë" shpesh shoqërohet me dënime në Rusi

Kohët e fundit, Putini e akuzoi Perëndimin se zhvillon një "luftë hibride" kundër Moskës. Megjithatë, ai deri tani i është përmbajtur përshkrimit të konfliktit në Ukrainë si  "operacion special". Kritika për misionin e ushtrisë ruse në Ukrainë dhe përdorimi i fjalës "luftë" në këtë kontekst dënohen me gjoba dhe burgim në Rusi.

Vetëm pak ditë më parë, Putini u konfirmua për një mandat të pestë në zgjedhjet presidenciale, në të cilat nuk u lejuan kandidatët e opozitës dhe vëzhgues të pavarur të zgjedhjeve. Vëzhguesit mendojnë se tani pas zgjedhjeve në Rusi mund të nisë një mobilizim i ri i pjesshëm.

ag/tg