Perspektiva e Turizmit në Kosovë

DW: Zoti Ustaibo, sa i rëndësishëm është ky panair për Kosovën? A shihet ndonjë interes nga Gjermania apo vende të tjera për bashkëpunim në këtë fushë?

C. Ustaibo: Ky është viti i dytë që Kosova merr pjesë në panairin e turizmit në Berlin, dhe për këtë arsye përfaqësimi i vendit tonë i rëndësishëm, sepse Kosova është një vend turistik dhe ky ishte edhe qëllimi ynë këtu në Berlin: që t'ju tregojmë të tjerëve se Kosova është vend turistik, është vend i sigurtë për të udhëtuar drejt saj dhe mbi të gjitha është pikë lidhëse me vendet e tjera ballkanike, të cilat vizitohen më tepër se Kosova. Pata fatin dhe ishte vërtet një kënaqësi e veçantë që u takova edhe me ministrin gjerman për Zhvillim, Dirk Niebel, i cili vizitoi stendën tonë të Kosovës në panair. Ai ishte i interesuar se çfarë ofron Kosova dhe na premtoi një bashkëpunim më të ngushtë mes dy vendeve. Pata rastin që të zhvillojë një takim edhe me ministrin turk të Turizmit lidhur me një bashkëpunim në të ardhmen në këtë fushë. Një favor për Kosovën është edhe fakti se prej 1 prillit Kroacia hyn në Shengen dhe kjo na krijon mundësinë tani që të kontaktojmë me shumë me agjencitë e vendeve përkatëse për shkëmbim turistësh.

DW: Kosova është në fakt një shtet i ri në Ballkan, por me një histori dhe kulturë qindraveçare. Sa po punohet në këtë drejtim që të tërhiqni turistë duke ofruar edhe këtë pasuri që ka Kosova? Pra pse duhet një i huaj ta vizitojë Kosovën, çfarë ofron ajo?

C. Ustaibo: Kosova duhet të vizitohet sepse mbi të gjitha ka histori, ka vende historike, ka vende skijimi të cilat tashmë janë gati për të konkurruar me ato në rajon. Kosova ofron ushqim tradicional mjaft të veçantë. Do të veçoja për Kosovën edhe mikpritjen e mirë dhe të ngrohtë. Një i huaj nëse vjen në Kosovë do të ketë mundësinë të njihet edhe me monumente të ndryshme historike e kulturore. Për këtë ne kemi përgatitur tashmë edhe katalogje përkatëse, ofrojmë video dhe reklama në televizione të ndryshme botërore që njerëzit kudo ku ndodhen të dijnë se çfarë ofron Kosova, ky shtet i ri në Ballkan, mbi të gjitha për monumentet e një trashëgimie kulturore mjaft të pasur. Në shumë zona rurale të Kosovës, e sidomos në ato malore, ende ruhen shumë zakone, tradita, lojëra, këngë, veshje e ushqime tradicionale. Në veçanti, për këto vlera shquhen fshatrat malore që shtrihen në Malet e Sharrit, e sidomos ato që i takojnë komunës së Dragashit. Në Kosovë janë xhamitë më të vjetra prej shekullit të 14-të, janë kishat orotdokse dhe katolike, disa sinagoga. Të gjitha këto dëshmojnë pikërisht për kulturën disa qindravjeçare.

DW: Kosova njihet për vendet turistike malore siç janë: Bjeshkët e Sharrit, Brezovica, Gryka e Rugovës apo liqenet siç është ai Betllavës ose Breznës. A janë ato në standartet e duhura europiane? A është infrastruktura në nivel që këto vende të shfrytëzohen nga qytetarët vendas dhe të huaj?

C.Ustaibo: Është e vërtetë që Kosova ka të zhvilluar turizmin dimëror, pra turizmin malor. Për këtë ka planprojekte për pikat kryesore turistike që ato të jenë sipas kritereve bashkëkohore. Brezovica, përshembull si një qendër e re e skijimit po ndërtohet shumë moderne dhe me të gjitha kushtet e duhura. Ajo do të jetë gati për 2-3 vjet duke u bërë edhe qëndra më e madhe në Ballkan për skijim. Në këtë kuadër do të jenë me kualitetin më të lartë edhe hotelet dhe infrastruktura. Madje ndërtimi i rrugëve të reja po krijon mundësinë e një komunikimi më të lehtë me vendet në rajon dhe në Europë. Po bëhen vazhdimisht përpjekje që të ketë në Kosovë hotele me pesë yje sipas kritereve evropiane meqë për momentin numri i tyre është i kufizuar. Besoj se në një të ardhme të afërt do t'i kemi të gjitha kushtet për turistët evropianë dhe të tjerë që ata t'ja kalojnë sa më bukur në vendin tonë. Në botë sot kemi 900 milionë turistë e deri në vitin 2025 pritet të jenë 3 miliardë turistë. Jam i sigurtë që edhe ne do të jemi pjesë e kësaj „torte“.

DW: Kosova është e rrethuar me vende turistike bregdetare siç është Shqipëria dhe Mali i Zi, por edhe me vendet e tjera që janë të njohura për turizmin e tyre. A po shfrytëzohet sa duhet ky privilegj i Kosovës zoti zevëndësministër?

C.Ustaibo: Tani ne kemi programe të përbashkëta me vendet tona fqinjë që janë vende më shumë turistike, siç është Shqipëria, Mali i Zi apo Maqedonia. Duke qenë se largësia mes tyre nuk është e madhe atëherë është në interes edhe të agjencive që turistët të vizitojnë njëkohësisht tre, katër vende në Ballkan. Kjo me siguri do të bëjë që në Kosovë dhe vendet përreth të ketë një bum turistësh. Dua të theksoj se Kosova si pikë strategjike gjeografike në rajon, që ndodhet diku në mes, ka mundësinë e shkëmbimit të turistëve apo të një gërshetimi mes turizmit bregdetar dhe atij malor. Pra të huajtë kanë mundësi që njëkohësisht të frekuentojnë dy lloj pushimesh. Për ne është shumë e rëndësishme që me këtë rast, pra përmes turzmit dhe aktiviteteve të tilla si ky në Berlin të prezantojmë edhe imazhin e Kosovës si një vend i sigurtë dhe me perspektivë në Europë.

Intervistën e zhvilloi Mimoza Cika Kelmendi