Incident në Tribunal: gjenerali kroat vdes në klinikë

Gjenerali boshnjako-kroat Slobodan Praljak, i dënuar me 20 vjet heqje lirie nga Tribunali i OKB-së për krime lufte, sipas agjencive të lajmeve vdiq në spital në Hagë. Këtë e bëjnë të ditur televizioni shtetëror kroat si dhe agjencia e lajmeve Hina. 72 vjeçari pati deklaruar më parë në sallën e gjyqit në kroatisht se është i pafajshëm dhe pastaj piu një lëng nga një shishe e vogël ose një gotë, në të cilin sipas fjalëve të tij ndodhej helm. Në seancën gjyqësore gjykata e pati konfirmuar dënimin e Praljakut, të vendosur në maj 2013.  

Gjykatësi që kryesonte seancën e ndërpreu menjëherë atë. Spektaktorët nuk mund patën mundësi të shikojnë, nëse i padituri u rrëzua. Gjykatësi dhe avokatët reaguan të tronditur.

Gjykimi ka rëndësi të veçantë për Kroacinë

Gjatë luftës së Bosnjës (1992-1995) Praljaku ishte komandanti i ushtrisë së kroatëve boshnjakë. Në procesin e apelit, Gjykata pati konfirmuar disa vendime kundër ekipit drejtues të kroatëve boshnjakë për shkak të krimeve të rënda të luftës në luftën e Bosnjës. Kështu, i akuzuari kryesor Jadranko Prlic (58), ish-kryeministri i shtetit të atëhershëm të vetëshpallur Herzeg-Bosna u dënua sërish me 25 vjet burg. Bruno Stojic, ish-përgjegjësi për mbrojtjen, mori njësoj si Praljaku 20 vjet heqje lirie. Ata akuzohen ndër të tjera për vrasje me paramendim, dëbim, tortura dhe përdhunime.

Ky dënim ka karakter veçanërisht shpërthyes për Republikën e Kroacisë, e cila sot është anëtare e BE. Sepse gjykatësit patën konstatuar në vitin 2013 në shkallën e parë bashkëfajësinë e Presidentit të atëhershëm Franjo Tudjman. Po të konfirmohet kjo, ndaj Kroacisë mund të paraqiten kërkesa për dëmshpërblim. Qeveria në Zagreb hedh poshtë çdo përgjegjësi.

Tribunali përfundon punën

Konfirmimi i vendimeve kundër Praljak, Prlic dhe Stojic qenë aktivitetet e fundit zyrtare të Tribunalit të OKB-së për Krime lufte, i cili e përfundon punën e tij pas rreth 24 vjetësh në fund të këtij viti. Tribunali ishte gjykata e parë ndërkombëtare për vendime për shkak të krimeve të luftës në Evropë, pas vitit 1945. Ish-udhëheqësin e serbëve të Bosnjës Radovan Karaxhic e dorëzuan në 2008 në Hagë. Në vitin 2016 atë e dënuan me 40 vjet burg, ndër të tjera për gjenocidin e Srebrenicës. Komandanti ushtarak i serbëve të Bosnjës, Ratko Mladic u kap në vitin 2011. Kundër ish-gjeneralit gjykatësit shqiptuan javën e kaluar një dënim me burgim të përjetshëm. Sot nuk është më askush në listën e përndjekjes së Gjykatës.