Hamburgu si shembull i tolerancës fetare

Mësimi i fesë islame dhe ditë pushimi për festën e Bajramit - së shpejti mund të bëhen realitet në Hamburg. Të martën (14.08.2012) kryebashkiaku i Hamburgut, Olaf Scholz, (SPD), ka paraqitur projektin e një marrëveshje me përfaqësuesit e 130.000 myslimanëve dhe 50.000 alevitëve në Hamburg. Marrëveshja parashikon ditë pushimi për festat islame, mësimin e fesë dhe rregullimin e ceremonive të varrimit.

Projekti është bërë pas pesë vite negociatash, të cilat kanë filluar me nismën e ish-kryebashkiakut Ole von Beust (nga CDU). "Qëllimi ishte arritja e një marrëveshje për të drejtat dhe obligimet në fusha të ndryshme të jetës", thotë Dietrich Wersich nga CDU.

Gjatë bisedimeve janë trajtuar temat si integrimi, dialogu i barabartë dhe njohja e vlerave gjermane nga myslimanët dhe alevitët. Për shembull: barazia e gjinive.

"Marrëveshja garanton dhe konfirmon në pjesë të madhe të drejtat e parashikuara edhe me Kushtetutë, shpjegon Zekeriya Altuğ, nga Unioni Turko-Islam (DITIB), i cili ka marrë pjesë në negociata.

Probleme ka pasur pjesërisht për faktin se kanë munguar bashkëbiseduesit myslimanë. Së pari është dashur të konfirmohet nëse mund të njihen shoqatat myslimane si shoqata fetare. Kjo tani është bërë dhe shpresoj se do të jetë një sinjal edhe për landet tjera, pohon Altuğ.

Festa e Kurban Bajramit si festë e njohur dhe e drejta e mësimit të fesë

Risi e marrëveshjes janë edhe përcaktimi i tri festave myslimane si festa zyrtare. Ndër to është edhe Kurban Bajrami, kur punëtorët myslimanë kanë të drejtë të qëndrojnë në shtëpi, por duhet të marrin pushim zyrtar apo të punojnë një ditë tjetër. Ndërsa nxënësit myslimanë mund të marrin ditë të lirë.

Ndryshime në shkollat e Hamburgut do të ketë edhe sa i përket mësimit të fesë myslimane. Myslimanët dhe alevitët në të ardhmen duhet të bashkëpunojnë me kishën evangjeliste dhe të përcaktojnë temat e mësimit të fesë islame në shkolla. Për këto qëllime do të ketë edhe mësues të veçantë.

Megjithatë kanë mbetur edhe disa paqartësi. Ende nuk dihet nëse feja islame do të mësohet si fe e veçantë në shkolla. Politikanët janë të mendimit se nxënësit duhet të mësojnë për të gjitha fetë dhe jo vetëm për disa. I këtij mendimi është edhe Olaf Scholz.

Ka dhe mosmarrëveshje të tjera sa i përket ndryshimeve ligjore për fenë. Kjo ka të bëjë edhe me ndërtimin e xhamive, pjesëmarrjen e shoqatave islame në bordet e mediave dhe bartja e shamive për gratë myslimane në të gjitha ambientet.

Përfaqësuesit e qytetit janë të mendimt se ata të cilët përfaqësojnë shtetin duhet të ruajnë edhe neturalitetin. Në polici, prokurori apo dhe në shkolla nuk mund të barten simbolet fetare, thotë përfaqësuesi i CDU-së ëersich.

Por të dy palët e vlerësojnë marrëveshjen si pozitive. Marrëveshjen kanë përshëndetur edhe kisha katolike dhe evangjeliste. Ajo tani duhet të konfirmohet edhe nga senati. Pritet që para qytetarëve të prezantohet në vjeshtë.