Dita Ndërkombëtare kundër Dhunës ndaj Gruas

53 kilometra e ndajnë Katja Schneidt nga një jetë e rrezikuar për vdekje për shkak të dhunës. 46 vjeçarja jeton sot në një qytet të vogël në landin e Hessenit, por 26 vite më parë jeta ishte në rrezik. "Qëndroja ulur në spital dhe pyesja veten, zot i madh, cilës klishe po i shërben tani", thotë Schneidt. "I dashur im turk më kishte bërë për spital." Një klishe që ndez paragjykime të vjetra. Katja kujton reagimet e rrethit të afërm. Je vetë fajtore, partneri yt është i huaj, sikur dhuna të ishte vetëm karakteristikë për të huajt. Ndërkohë që atë e gjen tek të gjitha grupet, thekson Schneidt.

Fjalia e zakonshme: Rënia nga shkallët

Çifti sapo kishte filluar të jetonte bashkë, kur ajo një ditë, pas vizitës tek mamaja, u desh të qëndronte gjatë në trafik. Kur u kthye i dashuri shkumëzonte nga zemërimi dhe e sulmoi brutalisht. Kur mjeku e pyeti për plagët, Katjas i erdhi zor dhe u përgjigj se kishte rënë nga shkallët. Ajo i qëndroi gënjeshtrës dhe doli nga spitali me brinjë të thyera dhe plagë të qepura. I dashuri që e priste jashtë, qante e kërkoi të falur. Katja dëshironte ndarjen, por nuk e pati të lehtë të gjente banesë në kohën e bashkimit të Gjermanisë. "Nuk kishte banesa që mund t'i paguaja", kujton ajo vendimin për të vazhduar jetën me të dashurin turk.

Sipas statistikave të Zyrës Federale të Kriminalistikës, BKA, çdo e katërta grua bie viktimë e dhunës. Vetëm në vitin 2015 ka pasur 104.000 raste dhune. Presidenti i BKA-së, Holger Münch, thotë se "dhuna kundër gruas ka disa profile". Në statistikat e BKA-së ka 16.200 kërcënime, 11.400 dhunime fizike të rrezikshme, 66.000 lëndime të lehta. 331 gra janë vrarë në partnerët e tyre.

Katja Schneidt shpëtoi nga një tragjedi edhe më e madhe, vetëm sepse një kolege e saj u tregua e vëmendshme. Pas katër vitesh frikë e shtypje, Katja kishte filluar të punonte në një dyqan buke, disa orë në javë. Shefi i kërkoi njëherë që të qëndronte më gjatë në punë për të mbyllur disa fatura. "E dija që nuk ishte ide e mirë", kujton ajo, sepse i dashuri nuk duronte asnjë vonesë. Ai erdhi në dyqan për ta marrë, por kur u futën në rrugicën e shtëpisë së tyre e qëlloi me gur aq rëndë, sa Katja ra pa ndjenja. Në shtëpi kur erdhi në vete ndjeu goditjet e tjera.

Katja nuk erdhi të nesërmen në punë, por kolegja e saj shkoi në shtëpi, të interesohej ç'kishte ndodhur. "Isha më shumë e vdekur se e gjallë", kujton ajo. I dashuri i tha koleges, se Katja ka shkuar tek nëna. "Ajo u përshëndet me përzemërsi dhe u nis menjëherë në polici, sepse kishte parë që makina ime ishte në rrugë", kujton Katja që u mor në mbrojtje nga policia.

Sot tema e saj është dhuna kundër grave. Për dhunën ajo ka shkruar disa libra. Të flasësh hapur për dhunën e ushtruar ndaj teje nuk është e lehtë as sot, thotë ajo. Nuk është vetëm dhuna dhe kërcënimi, por edhe turpi, dyshime ndaj vetes dhe trauma që i bëjnë viktimat të heshtin. Për këtë angazhohet edhe politika në Gjermani. "Kjo tabu duhet të thyhet", kërkon ministrija e Familjes, Manuela Schleswig. Dhuna shtëpiake nuk është diçka private, por "një akt penal që duhet të ndiqet si i tillë."