Bashkimi i Gjermanisë në dritë europiane

Harku i triumfit në Bruksel është dekoruar për festën e 25 vjetorit të ribashkimit të Gjermanisë me flamuj e drita. Vizitorëve belgë kjo u pëlqen, sepse tre ngjyrat e flamurit gjerman përkojnë edhe me ato të flamurit belg.

Gjatë ditës harku i trefishtë i triumfit dëshmon themelimin e Belgjikës në vitin 1830. Ndërtesa 50 metra e lartë është ndërtuar në vitin 1905. Qyteti i Brukselit ia ka lënë atë në dispozicion Ambasadës Gjermane në BE për dekorimin me artin e dritave me rastin e festës së bashkimit. Në flandrisht ky territor quhet "Jubelpark" (parku i brohoritjes). Kjo i shkon për shtat edhe festës.

Menaxheri holandez i eventeve Martijn Adema nga agjencia "Vision Impossible" ka prodhuar videon tetë minutëshe, që projektohet në harkun e triumfit. "Sfida më e madhe ishte sipërfaqja e madhe e projektimit." Për këtë agjencia e tij ka sjellë këtu Beamer-in më të fuqishëm të Europës.

Projektimi i Hitlerit dhe i mizorisë së Luftës së Dytë Botërore në fasadën e një ndërtese në Belgjikë është nismë me risk, por e nevojshme. Kështu mendon drejtuesi artistik i projektit Matthias Zeckert. Spektakli hapet me luftën si zanafilla e ndarjes gjermane.

Perdja e hekurt mes Perëndimit (blu) dhe Lindjes së kuqe ndau Europën deri më 1989. Në një retrospektivë të shpejtë historike mbi harkun e triumfit shfaqen Churchill, Kennedy dhe Gorbaçovi që dëshmojnë për një epokë intensive në një botë të ndarë.

Harku i triumfit shndërrohet në Mur të Berlinit me kulla vrojtimi. Por muri izolues çnjerëzor nuk mban. Njerëz që çajnë murin, vetura trabant e njerëz të gëzuar kalojnë në anën tjetër. Edhe fjalimi i anëtarit të byrosë politike në RDGJ, Günter Schabowski me lapsusin historik jehojnë në parkun e brohoritjes "Jubelpark" në Bruksel: "Sipas dijenisë sime (liria e lëvizjes) hyn në fuqi menjëherë."

Pas Gjermanisë edhe Europa hedh hapa të mëtejshëm drejt bashkimit. Ish-shtetet lindore, dikur komuniste, si dhe Malta e Qiproja antarësohen në BE. Një shtëpi, një familje duhet të zhvillohen. Vendosen liria e lëvizjes dhe monedha e përbashkët.

Spektakli me drita nuk lë në hije as temën e krizës. Europa po goditet prej krizës së Euros dhe krizës ekonomike pas vitit 2008. Me shumë vështirësi Gjermania dhe Europa po ia dalin. Presidenti i Bankës Qendrore Europiane, Mario Draghi, do të bëjë ç'është e mundur, për ta shpëtuar Euron.

Spektakli i bashkimit trajton edhe temën aktuale të refugjatëve në Europë. Shumica duan të vijnë në Gjermaninë e bashkuar. Kjo krizë është një sfidë për Europën e bashkuar dhe të hapur, në të cilën tani përkohësisht po mbyllen kufijtë.

"Ne nuk donim t'i heshtnim krizat", thekson ambasadori gjereman në BE, Reinhard Silberberg duke shpjeguar konceptin e spektaklit. Qëllimi është të tregojmë kapërcimin e ndarjes gjermane dhe zhvillimin e Europës. "Festa është edhe në shenjë falenderimi ndaj qytetarëve të Brukselit, sepse ne jemi këtu vazhdimisht mysafirë."

Nuk ka vetëm video-instalacione, por rreth 20.000 vizitorëve në Jubelpark u ofrohen edhe evente muzikore nga DJ ndërkomëbtarë. Tingujt dëgjohen shumë larg edhe përtej kuartierit të Europës.

Me drita në projektim tredimensional në harkun e triumfit në Bruksel shfaqet edhe Porta e Brandenburgut në Berlin, ndonëse këtu me dy kolona më pak. Për një ditë në "Jubelpark" do të brohoritet për themelimin e shtetit gjerman e jo të atij belg. Spektatorët belg e pranojnë të çlirët këtë.