Arrestohen tre gjermanë për spiunazh për Kinën

Dy meshkujt dhe gruaja u arrestuan në Düsseldorf dhe Bad Homburg nga agjentë të Zyrës Federale të Policisë Kriminale, sipas Zyrës së Prokurorisë Federale në Karlsruhe. Ata akuzohen se kanë punuar për shërbimin sekretkinez më e vonta që nga qershori i vitit 2022 dhe se kanë shkelur Ligjin e Tregtisë së Jashtme dhe të Pagesave në këtë kontekst. Janë kontrolluar shtëpitë dhe vendet e punës të të dyshuarve.

Thomas R. ishte agjent i një punonjësi të shërbimit të fshehtë në Kinë dhe kishte marrë informacione për teknologjitë inovative të përdorshme ushtarakisht, në emër të Kinës. Për ta bërë këtë, R. përdori shërbimet e çiftit Herwig dhe Ina F., të cilët drejtojnë një kompani në Düsseldorf, shtoi zyra e prokurorit federal. Kompania shërbeu si një mjet për të vendosur kontakte dhe për të bashkëpunuar me përfaqësues të shkencës dhe kërkimit gjerman. Çifti kishte lidhur një marrëveshje bashkëpunimi me një universitet gjerman për transferimin e njohurive shkencore nëpërmjet kompanisë.

Spiunazh për fuqinë luftarake detare të Kinës?

Faza e parë e marrëveshjes ishte përgatitja e një studimi për një partner kontraktual kinez mbi teknologjinë më të fundit të pjesëve të makinerive, që janë gjithashtu të rëndësishme për funksionimin e motorëve të fuqishëm detarë në anijet luftarake, për shembull. Partnerit kontraktual kinez ishte në fakt punonjësi i shërbimit sekret kinez.

Të dyshuarit kishin blerë edhe një lazer special për llogari të Kinës dhe e kishin eksportuar në këtë vend pa autorizim. Sipas informacioneve nga Karlsruhe, këtë të hënë dhe të martë ata do të dalin para gjyqtarit hetues të Gjykatës së Lartë Federale.

Spiunazhi nga Kina për përfitime ekonomike, por edhe nga shërbimet e inteligjencës ushtarake, konsiderohet si një nga kërcënimet më të mëdha për ekonominë dhe universitetet gjermane. Interesant në rast aktuale është se tentativa për spiunazh nuk është kryer direkt nga kinezët, por me sa duket është krijuar një kompani maskuese përmes të akuzuarve.

Të mërkurën, policia arrestoi në Bavari dy meshkuj, të cilët dyshohet se po spiunonin për Rusinë. Dy shtetasit gjermano-rusë dyshohet se kanë punuar për një shërbim sekret të huaj në një çështje veçanërisht të rëndë, sipas prokurorit të përgjithshëm të Gjykatës Federale të Drejtësisë.

Spiunazhi në qendër të vëmendjes politike

Duke komentuar arrestimet e fundit, Ministri Federal i Drejtësisë Marco Buschmann (FDP) tha të hënën: "Kushdo që punon për shërbimet e huaja të inteligjencës në Gjermani dhe eksporton ilegalisht materiale potencialisht të dobishme ushtarake, duhet të presë një përgjigje të ashpër nga shteti ynë ligjor. Veprat penale në fjalë tregojnë edhe një herë se duhet të jemi vigjilentë".

Ministrja e Brendshme e Gjermanisë, Nancy Faeser, shpjegoi se rreziku i konsiderueshëm që paraqet spiunazhi kinez në fushën e biznesit, industrial dhe shkencor është në qendër të vëmendjes. "Ne po i studiojmë nga afër këto rreziqe dhe kërcënime dhe kemi nxjerrë paralajmërime të qarta dhe ndërgjegjësuese, në mënyrë që masat mbrojtëse të rriten kudo”, tha Faeser. Fusha e teknologjive inovative me aplikime ushtarake të prekura në rastin konkret është veçanërisht e ndjeshme, tha ajo, duke e bërë edhe më të rëndësishme që spiunazhi në këtë fushë të ndeshet me hapa të vendosur.

kle/gri (afp, dpa, tagesschau.de)