کندهار: ځانمرگي برید شپږ تنه ووژل
۱۳۹۱ مهر ۲۲, شنبه
یادښت: انځور له ارشیف څخه
د طالبانو یوه ویاند د دې برید پړه پر غاړه اخیستې ده او ویلي ئې دي چې موخه ئې د افغان او بهرنیو امنیتي ځواکونو په نښه کول وو.
په همدې حال کې افغان چارواکو ویلي دي چې پېښه د کندهار ولایت په ماروف ولسوالۍ کې رامنځ ته شوې ده چې په کې وژل شوې افغانان ټول د ملي امنیت کار کوونکي دي.
تر دې مخکې د کندهار ولایت ویاند جاوید فیصل ویلي وو چې یوه ځانمرگي برید کوونکي د کندهار ولایت د ماروف ولسوالۍ د ملي امنیت ادارې مخې ته خپل ځان وچاوه چې له کبله ئې د ملي امنیت درې تنه کارکوونکي ووژل شول او څلور تنه نور ټپیان دي.
په یوې بلې پېښې کې په زابل ولایت کې هم د دوو چاودنو له کبله دوه تنه پولیس وژل شوي او درې تنه نور تپیان دي.
د زابل ولایت ویاند شیرالله ناصري، د اسوشیتد خبري آژانس ته ویلي دي چې لومړی د پولیسو یو موټر د سړک د غاړې پر یوه ماین باندې برابر شو او کله چې نور پولیس د دې موټر د مرستې له پاره سیمې ته ورسیدل نو دویمه چاودنه هم وشوه.
مسعود جهش (د فرانسې خبري آژانس، اسوشیتد پرس)
کتونکی: احمد ولي اڅکزی