کابل کي د امريکايي ډرون بريد قربانيانو ته د تاوان وړانديز
۱۴۰۰ مهر ۲۴, شنبه
د متحده ايالاتو پوځ د اګست په مياشت په کابل کي پر يو موټر هوايي بريد وکړ. په دغه بريد کي ۱۰ انسانان ووژل سول چي ټول ملکيان ول. هغه وخت د امريکا د متحده ايالاتو پوځ ويلي ول چي په دغه بريد کي يې ترهګر وژلي دي خو وروسته څرګنده سوه چي وژل سوي کسان ټول ملکيان دي.
اوس د متحده ايالاتو دفاع وزارت د وژل سوو کسانو و کورنيو ته په غير معين مقدار پيسو د تاوان ورکولو وړانديز کړی دی. دغه وزارت د دې تر څنګ اعلان کړی دی چي د وژل سوو کسانو له کورنيو څخه چي هر کس غواړي امريکا ته کډوال سي، نو پنټاګون به ورسره مرسته وکړي.
د بې پلوټه الوتکي دغه بريد د روان ۲۰۲۱ کال د اګست مياشتي په آخره کي تر سره سوی ؤ. پکښي له وژل سوو لسو کسانو څخه ۷ يې ماشومان ول. په وژل سوو کسانو کې يو کس چي زمری احمدي نوميدی، د يو نړيوال مرستندوی سازمان همکار ؤ. دغه نړيوال سازمان د خوراک او تعليم په برخه کي په افغانستان کي فعاليتونه کول.
د پنټاګون وياند جون کيربي ويلي چي احمدي او په بريد کي وژل سوي نور ټول کسان بې ګناه ول او د داعش ډلې د خراسان څانګي سره يې هيڅ تړاو نه درلود. هغه زياته کړې چي دغه بريد يوه ويرجنه تېروتنه وه.
آ./ا.ا.
پر ورته موضوع زموږ له آرشيف څخه يو انځوريز راپور: