په کندز، بدخشان او کنړ کې چاودنې شوي
۱۴۰۱ خرداد ۲۲, یکشنبه
د آلمان خبري آژانس د طالبانو د کندز د پولیسو وياند، عبيدالله عابدي له قوله ليکي چې په کندز ښار کې دغه چاودنه د چاودیدونکو موادو وه چې د ميوې د خرڅلاو په یوه کراچۍ کې ځای پر ځای شوي ول. هغه وويل چې په دغې چاودنه کې چاته زیان نه دی رسیدلی.
خو د کندز ښار ېوه اوسیدونکي د نوم د نه ښودلو په شرط دویچه ويله ته وويل چې په دغې چاودنه کې يو شمیر کسان ټپیان شوي دي: «خلک وايي په چاودنه کې څو تنه ژوبل شوي دي او د روغتون ډاکتران هم وايي چې درې تنه ټپیان دوئ ته ور وړل سوی دي.»
یاد کس زیاته کړه چې دغه چاودنه د کندز ښار د صرافۍ مارکيټ ته څيرمه د کهنه فروشۍ په رسته کې شوې ده.
دې سره جوخت د بدخشان په مرکز فیض آباد ښار کې هم یوه چاودنه شوې چې د رپوټونو له مخې يو ماشوم په کې ټپی شوی دی.
ځايي طالب چارواکو په افغانستان کې خصوصي تلویزیون، طلوع نیوز، ته ويلي دي چې چاودنه هغه وخت رامنځ ته او یو ماشوم ېې ټپي کړ چې د طالبانو د امنيتي ځواکونو يو موټر د سړک غاړې یو ماین باندې وخوت.
د آلمان خبري آژانس وايي د کنړ ولایت په مرکز اسعد آباد کې هم د يکشنبې په ورځ ورته پيښه رامنځ ته شوې، خو زیاتوي چې د چارواکو له خوا د پيښې کوم تصدیق په اختیار کې نه لري.
د يکشنبې په ورځ (د جون ۱۲مه) دغه چاودنې داسې وخت شوي چې تر دې يوه ورځ مخکې د کابل ښار په مربوطاتو کې يو ميني بس موټر د بمي حملې هدف وګرځيد چې د طالبانو د کورنیو چارو وزارت په خبره څلور کسان په کې ووژل شول او یو شمیر نور ټپيان شول.
له بل لورې طالبان ادعا کوي چې په تخار ولایت کې ېې د يوې، يو ساعته جګړې په جریان کې د داعش ډلې ۸ غړي وژلي دي. د آلمان خبري آژانس په دې اړه خپل رپوټ کې نور جزئیات نه دي ورکړي.
زیاته شوې چې د یادو چاودنو مسئولیت چا نه دی منلی، خو په افغانستان کې تيرکال واک ته د طالبانو تر رسیدلو وروسته، په دغه هیواد کې د اکثرو حملو مسئوليت داعش ډلې منلی دی. په افغانستان د داعش شاخه د خراسان په نوم یاديږي چې طالبان ورسره عملا جګړه کوي.
آ/م.ک.ص./ا.ا.