په پکتیکا کې د کرومیټ ډبرو له کان څخه استخراج پیل شو
۱۴۰۲ شهریور ۱۸, شنبه
د باختر خبري اژانس، چې د طالبانو ادارې تر کنټرول لاندې فعالیت کوي، راپور ورکړی دی، چې د پکتیکا په ګیان ولسوالۍ کې له کرومیټو کان څخه استخراج د یو لړ مراسمو په ترڅ پیل شو.
د پکتیکا ولایت د چارواکو په وینا، د کرومیټ ډبرو دا کان د کانونو او پترولیم وزارت له لورې یوه خصوصي شرکت ته سپارل شوی، چې دغه شرکت به د پنځو کلونو لپاره له دې کان څخه کرومیټ ډبري استخراجوي.
د طالبانو ادارې د پکتیکا د کانونو او پترولیم رئیس مولوي نظیرګل صاد وویل، چې دغه شرکت به په پنځو کلونو کې له دې کان څخه ۹۰ زره ټنه کرومیټ ډبرې استخراج کړي او د هر ټن کرومیټ په بدل کې به پنځلس زره او سل افغانۍ طالبانو ته ورکوي.
د پکتیکا ولایت د دغه طالب چارواکي د شمېرو پر بنسټ، د طالبانو اداره به د ګیان ولسوالۍ د کرومیټ ډبرو د دغه کان له استخراجڅخه یو میلیارد او ۳۵۹ میلیونه افغانۍ عواید ترلاسه کړي.
د دغه کان د استختراج کوونکي شرکت یوه مسئول د باختر خبري اژانس ته وویل، چې د پکتیا د ګیان کرومیټ کان، د کیفيت او حجم له پلوه د افغانستان د کرومیټ ډبرو د کانونو په منځ کې لومړی مقام لري.
د طالبانو ادارې، تېره اونۍ دافغانستان د اوو سترو کانونو استخراج،څو افغاني او بهرنيو شرکتونو ته په قراردادونو ورکړل.