په نړیواله کچه د ماشومانو او تنکیو ځوانانو حرکت ډیر کم شوی دی

کوچني ماشومان په طبیعي ډول منډې او ټوپونه وهي او په دې ډول بدني فعالیت لري. دوی د حرکتونو په اجرا کولو سره خپل احساسات څرګندوي او هغه څه یي چې زده کړي دي پرې کار کوي. ماشومان آرامه کښيناستل نه لري. خو دا کار تر یو خاص عمره پورې دوام کوي. د روغتیا د نړیوال سازمان د نوې څیړنې له مخې په نړۍ کې ۸۰ سلنه هغه تنکي ځوانان چې له ۱۱ څخه تر ۱۷ کلونو پورې عمرونه لري په کافي اندازه فزیکي حرکت نه لري.

۸۵ سلنه نجونې او ۷۸ سلنه هلکان د روغتیا نړیوال سازمان له خوا د بدني حرکت په اړه سپارښتنې نه عملي کوي. د ورزش او بدني حرکت نشوالی روغتیا ته زیان رسوي، ځکه حرکتي لوبې او ورزش په بدن کې خوشحالي بخښونکي مواد تولیدوي. برعکس په دوامداره توګه د فزیکي حرکت نشتوالی انسان ته پریشانه کونکی حالت پيدا کوي.

د الکترونيکي وسایلو لکه کمپیوټر، ځیرکه تلیفونونه، آیپيډ .... په څیر بل هیڅ کوم شی د ماشومانو د بدني حرکت مخ ته خنډ نه شي جوړیدلی. یو شمیر ميندې او پلرونه چې له کاره ستړي راځي، د دې په خاطر چې د یوڅه وخت له پاره یي ماشومان آرامه وي هغوې په انټرنټي لوبو مصروفوي. خو دا کار د ماشومانو ذهني قابلیت ته زیان رسوي او ترڅنګ یې د فزیکي حرکتونو نشتوالی روغتیا هم ګواښي.

که ماشومان او تنکي ځوانان هر څومره ورزش وکړي عضلې یي قوي کیږي. د ښو عضلو لرل د ملا تیر د استقامت د زیاتیدو سبب کیږي. همدارنګه د ماشومانو د بدن سکلیټ له ورزشي حرکتونو څخه په ګټې اخیستنې سره خپل تراکم زیاتوي او د نورو ترڅنګ د هډوکو د ورستیدو پر ناورغۍ له اخته کیدو څخه هم مخنيوی کیږي.

هغه ماشومان چې په کافي اندازه فزیکي حرکتونه لري کولی شي تر یوې اندازې د خپلې خوښې له شیرنيبابو څخه استفاده وکړي، خو هغه ماشومان چې فزیکي حرکتونه نه لري او له ناسالمه خوړو څخه استفاده کوي کیدای شي له روغتيایي ستونزو سره مخامخ شي. چاق ماشومان معمولاً په لوړ عمر کې د رګونو د بندیدو، د وينې فشار، مغزي او قلبي سکتې له خطر سره مخامخ کیږي.

په چين کې ډیر شمیر ماشومان او تنکې ځوانان د فزیکي حرکت د نشتوالي او نا مناسبو خوړو له امله له ستونزو سره مخامخ دي. په اوږدمهاله کې دا نه یوازې پخپله د دوی روغتیا ته زیان رسوي، بلکې د ټولې ټولنې د اوږو بار شي. له درملنې نیولې بیا د ناروغۍ له امله تر وخت مخکې تقاعد پورې دوی د ټولنې د اوږو بار وي. صحتمنده او انرژي لرونکي ماشومان بالاخره ټولنې ته خوشحالي او سوکالي وربخښي.