په مصر کې د ولسمشرۍ درې ورځني انتخابات پيل شول
۱۴۰۲ آذر ۱۹, یکشنبه
د مصر انتخابات په داسې وخت کې پیل شوي چې په ګاونډ غزه کې د اسرائيل او حماس تر منځ جګړه روانه ده او مصر له سخت کورني اقتصادي بحران سره مخ دی.
د یکشنبې په ورځ په پلازمينه کې د رای اچونې ګڼ مرکزونه د مصر پر رنګين بیرغ تزئين شوي ول په داسې حال کې چې له مرکزونو بهر میهني موزیک اورېدل کېده.
دغه انتخابات به د درو ورځو له پاره یعنې تر سه شنبې پورې ادامه ولري. تر ډېره بريده تمه کيږي چې موجوده ولسمشر، عبدالفتاح السيسي به د دغو انتخاباتو ګټونکی شي. السيسي له ۲۰۱۴م کال راهيسې واک چلوي او د اوسنيو انتخاباتو د ګټلو په صورت کې به د دريم ځل له پاره د مصر ولسمشر شي.
د السیسي تر څنګ درې نور نوماندان هم د مصر د ولسمشرۍ څوکۍ د تصاحب له پاره مبارزه کوي. دغه درې نوماندان دي د سوسيال دموکرات ګوند کيڼ اړخی سیاستوال فرید زهران، د وفد ليبرال ګوند مشر عبدالسند یمامه او د جمهوري غوښتونکي خلق ګوند موسس حازم عمر دي.
عمر د نوې قاهرې په سیمه کې تر رای ورکونې وروسته وويل: «زه له خلکو غواړم چې ګډون وکړي.» هغه رای ورکونکو ته په اشارې زياته کړه: «زه خوښ یم، کوم څه چې د رای اچونې له مرکزونو بهر وينم.»
د مصر دولتي رسنيو خبر ورکړ چې السيسي نن د قاهرې په ختيځ کې پروت هلیوپلیس ښار کې د رای اچونې يو مرکز ته ولاړ او خپله رایه يې وکاروله، خو څه ېې ونه ويل.
السيسي په مصر کې د لوړ پولي انفلاسيون باوجود، يو ځل بیا یو څه ښکاره ملاتړ ترلاسه کړی. هغه د حماس او اسرائيل جګړې له کبله په ګاونډیو هېوادونو کې له غزې څخه د بېځایه شوو د ځای پر ځای کېدو څخه اندېښنه ښوولې چې اکثریت مصریان هم د هغه له دغو خبرداريو سره همغږي لري.
هغه وايي دا ډول هر مهاجرت د فلسطينیانو ارمان ضعیفولی شي. السيسي همدارنګه داسرائيلاو حماس تر منځ د اکتوبر په ۷مه له پيل شوې جګړې راهیسې خبرداری ورکوي چې د فلسطينيانو بې ځايه کېدلو له امله کېدای شي د مصري سینا نيمه ټاپو په سیمه کې کړکېچ رامنځ ته شي.
د حکومت ملاتړ کونکې رسنيو ښودل چې د مصر په مختلفو سیمو کې خلک د رای اچونې مرکزونو مخې ته ولاړ دي. دوی په خپلو لاسونو کې د عربي نړۍ د دغه مشهور هېواد بیرغونه لیږدول او ښورول.
. کميسیون که څه هم د ګډونوالو مشخص شمېر ونه ښود، خو ويې ويل چې له سهار وختي راهيسې ګڼ شمېر رای اچونکي د رای اچونې مرکزونو ته راغلي ول.
(dpa)mks/mns
له آرشیف څخه: