په سلونو افغانانو په پاریس ښار کې د ايران پر ضد لاريون وکړ

په فرانسه کې ميشت افغان اعتراض کونکي د پاريس ښار په مشهور چوک (ريپبليک) کې راټول شوي ول.

د پاريس ښار د شنبې ورځې د لاريون اصلي انګیزه، د رپوټونو پر اساس په وروستيو کې د ایراني پوله ساتو ځواکونو له خوا سيند ته د شاوخوا ۵۰ تنو افغانانو اچول او په يوه بله تازه پيښه کې د ايران په خاوره کې د يو شمیر افغان مهاجرو سوځول او ټپي کيدل وو.

په پاریس ښار کې ميشت افغانان وايي وروسته له هغې چې دوی فرانسوي چارواکو ته په ايران کې د افغان مهاجرو د سوځيدو ويډيو وښوده هغوی د لاريون اجازه ورکړه.

د لاريون سمبالونکي امرالله صافي دویچه ویله ته وويل چې دغه لاريون په پاریس ښار کې د «افغانانو مرکزي ټولنې» په نوښت د فرانسې پولیسو سره په همغږۍ په لاره واچول شو.

امراالله صافي وويل چې د فرانسې چارواکو لومړی دوی ته د ایران سفارت مخې ته د ۳۵ کسانو د اعتراض اجازه ورکړې وه، خو د خلکو د ډيروالي له امله، لاريون ته د ريپبليک په نوم چوک انتخاب شو.

په فرانسه کې ميشت افغان اعتراض کونکي د پاريس ښار په مشهور چوک (ريپبليک) کې راټول شوي ول. دوی ځانونو سره داسې پلاکاټونه هم ليږدول چې د ايران ضد شعارونه پرې ليکل شوي وو.

په دغه لاريون کې د افغانانو تر څنګ په فرانسه کې میشتو يو شمير ايرانيانو هم ګډون کړی وو.

ايرانيانو هم افغانانو سره خپله خواخوږي ښودله او د ايران پر حکومت يې غږ وکړ چې د افغانانو حقوقو ته درناوی وکړي.

په پاريس ښار کې افغان لاريون کونکو په خپله اعلاميه کې وويل که هر کله پر افغانانو ظلم کيږي دوی به يې پر ضد خپل اواز اوچتوي.

صافی وايي، دوی ډاډمن دي چې دغه ډول سوليز لاريونونه به افغانانو، په ځانګړې توګه افغان مهاجرو له پاره ګټور واقع کيږي.

د پاریس ښار د جون ۱۳مې لاريون ګډونوالو ويل که د افغانانو پر وړاندې هر هيواد غیرقانوني زورزياتی کوي، که هغه ایران وي، پاکستان يا بل، نو افغانان به يې پر ضد خپل آواز اوچتوي.

امرالله صافی وايي چې د فرانسې پولیسو ورسره ژمنه کړې چې د غوښتنې په صورت کې به د ایران سفارت مخې ته هم د مظاهرې اجازه ورکړي.

په فرانسه کې افغان مهاجر وايي اوس دوی د ایران غبرګون ته منتظر دي که چيرته مثبت ځواب ترلاسه نه شو بیا به لاریون کوي.

د لاريون د سمبالونکي په وينا، که څه هم اوس په فرانسه کې د ماسک تړل اجباري نه دي خو ډير شمير ګډونوالو احتياطاً ماسکونه تړلي ول.

په فرانسه کې افغان مهاجر وايي اوس دوی د ایران غبرګون ته منتظر دي که چيرته مثبت ځواب ترلاسه نه شو بیا به لاریون کوي. چمتو کونکی: محمد کريم صالح/ ن.ص

په همدې ورځ د پاریس په ريپبليک چوک کې له افغانانو علاوه شاوخوا ۲۰ زره فرانسویان هم په نړۍ کې له مهاجرو سره د تاوتريخوالو پر ضد راټول شوي وو.