په ترمپ ټاور کې اور یو تن وژلی او څلور یې ټپیان کړي
۱۳۹۷ فروردین ۱۹, یکشنبه
د نیویارک ښار د پولیسو ادارې ویلي چې د ترمپ ټاور په پنځوسم پوړ کې د اور لیګدنې په پایله کې اور وژونکو ۶۷ کلن ټوډ براسنر د بې هوښۍ په حالت وموندو.
امریکايي رسنیو په ترمپ ټاور کې میشت د براسنر د هویت په هکله ویلي چې نوموړی د هنري اثرونو سوداګر وو. د پولیسو په وینا تر پیښې وروسته کله چې نوموړی د مونت سینای روزی ویلت روغتون ته انتقال کړل شو، نوموړي خپل ژوند له لاسه ورکړی وو.
د نیویارک ښار د اور وژنې ادارې د پیښې په تړاو وویل: «دا ډیر سخت اور وو. لکه څرنګه چې فکر کوئ، دغه ودانۍ ډیره دنګه ده او موږ باید ۵۰ پوړه پورته تللي وای. په پاتې نوره ودانۍ کې هم ډیر دود وو.»
یادې ادارې ویلي چې په پیښه کې ټپي څلور اور وژونکي شدید نه دي ټپي شوي او اور تر کنترول لاندې راوستل شوی دی. د اور لیګدنې دغه پیښه په ځايي وخت له غرمې وروسته شاوخوا ۶۰ بجې پیښه شوې.
د ترمپ ټاور دغه ودانۍ د ولسمشر ترمپ مالکیت دی چې پکې د ترمپ سازمان فعالیت او یو شمیر خلک پکې ژوند کوي. د اور تر کنترول وروسته ولسمشر ترمپ هم بیا وروسته ویلي چې اور له منځه وړل شوی او له اور وژونکو یې مننه کړې.