په بغلان کي د يوه کان د نړيدو په پېښه کي لس کسان مړه شوي
۱۴۰۰ بهمن ۱۴, پنجشنبه
د آلمان خبري آژانس د بغلان ولایت د اطلاعاتو او کلتور ریاست د مشر مصطفی هاشمي له قوله لیکلي دي چې ۱۳ غیر مسلکي کسان په نهرین ولسوالۍ کې د ډبرو سکرو د کان په کیندنه بوخت ول چې هغه راونړید.
د هاشمي په خبره د ژغورنې ټیم تر خرابیو لاندي د اوو کسانو جسدونه رایستلي دي او د درو نورو جسدونو د رایستلو هڅه کیږي. د هغه په خبره درې کان کیندونکي په دغه پېښه کې ژوندي پاتې شوي دي.
د آلمان خبري آژانس په خپل رپوټ کې لیکلي دي، افغانستان چې د طبیعي زیرمو بډای هیواد دی د کانونو په غیر مسلکي او په غیر قانوني توګه کیندنو په پایله کې دغه ډول پېښې تل رامنځته کیږي. رپوټ زیاتوي چې دا خبره هم لا روښانه نه ده چې اوس طالبان تر کومې کچې د کانونو پر سکتور باندې واک لري.
زیاته شوې ده چې په تیر وخت کې چې کله طالبان په یاغیتوب کې ول، پخپله یې د غیر قانوني کان کیندنې څخه ګټه پورته کوله.