پر هرات ولایت باندې ملخانو هجوم وروړی

دغو ملخانو له یوه اړخه د ښار څیره بدله کړې او له بل اړخه یې د حاصلاتو د له منځه وړلو په هکله د بزګرانو سخته انديښنه راپارولې.

هرات ته د دغې حشرې د هجوم وروړلو علت، په ګاونډیو ولایتونو کې د سخت توپانونو رامنځ ته کیدل او د هوا نامناسب وضعیت عنوان شوی دی.

خو د هرات ولایت د کرهنې ادارې مسوولین وایي چې دغه ډول بومي ملخانو حاصلاتو ته کوم زیان نه رسوي.

د هرات د کرهنې ادارې رئیس عبدالصبور رحماني وایي چې د دغې ادارې دوا پاشونکي ټیمونه ولسوالیو ته استول شوي دي او ځینې زراعتي ځمکې یې د دغو ملخانو د له منځه وړلو له پاره دوا پاشي کړي دي.

خو د زراعتي چارو پورهان وایي، چې معمولا هغه ملخان چې له ایران او ترکمنستان څخه افغانستان ته راځي او د مراکشي ملخانو په نوم مشهوره دي، د زراعتي حاصلاتو له پاره مضره دي خو دغه بومي ملخان به زیان رسونکي نه وي او په راتلونکو ورځو کې به له منځه ولاړ شي.

د هرات له ګاونډي ولایت فراه څخه هم داسې رپوټونه ورکړل شوي چې د ملخانو سترې څپې پر فراه ښار هجوم وروړی او خلک یې په حیرانتیا کې اچولي دي.

له بل اړخه د ملخانو راتګ په هرات کې د ماشومانو له پاره د خوښۍ سبب ګرځیدلی.

ماشومان په کوڅو، کورونو او آن د سړکونو پر سر له دغو بې آزاره ملخانو سره لوبې کوي او د کرونا ویروس یې هیر کړی دی.

تیر کال په همدې موسم کې هرات ښار ته د زرونو پتنګانو مهاجرت د ښار بڼه دومره ښایسته کړې وه چې د عامو خلکو ترمنځ د هرات ښار د ښایسته رنګونو پتنګانو په نوم مشهور شو.