پاکستان د ناقانونه افغان کډوالو لپاره نوې تګلاره جوړوي
۱۴۰۲ شهریور ۲۵, شنبه
د پاکستان لنډمهالي لومړي وزیر انورالحق کاکړ ویلي، هغه افغان کډوال چې د پاکستان ویزه او یا د اوسېدو قانوني اسناد ونه لري، سملاسي بېرته اېستل کیږي.
د پاکستاني رسنیو د رپوټونو له مخې ددغه هېواد لنډمهالي حکومت د ټولو هغو افغانانو پرضد هم د ګام اخېستو پریکړه کړې چې پاکستان کې یې د اوسېدو ناقانونه اسناد جوړ کړي دي.
اوسمهال پاکستان کې تر یو میلیون ډېر افغان کډوال ژوند کوي، چې په هغوی کې سلګونه یې قانوني اسناد نه لري.
په دې وروستیو کې د پاکستان حکومت په دغه هېواد کې د افغانانو د نېولو کېدو لړۍ تېزه کړې ده.
د طالبانو حکومتد کډوالو چارو وزارت پر خپله ایکس پاڼه لیکلي، د سپین بولدک له لارې ۶۵۰ افغان کډوال هېواد ته راستانه شوي دي. «د سپين بولدک د مهاجرينو چارو آمر په خبره په يادو راستنېدونکو کې۹۰ کورنۍ، چې۶۵۰ تنه کېږي هېواد ته راستنې شوې، چې د ثبت او راجستر وروسته ۴۷۰ تنه يې د مرستو د ترلاسه کولو په موخه د مهاجرت نړيوال سازمان ته ور وپېژندل شول.»
د طالب چارواکو پروینا تېرو پنځو ورځو کې ۱۷۲ هغه افغان کډوال هم د سپین بولدک له لارې هېواد ته رااوښتي، چې د قانوني سندونو نه لرلو له امله پاکستاني پولیسو نېولي ول.