يوه سړي څرنگه پخپلو کولمو کي کوکاين قاچاقول؟
۱۳۹۸ تیر ۱۳, پنجشنبه
آلماني چارواکو ویلي دي چې د دې ۳۳ کلن کس په کولمو کې د کوکاېنو ۴۱ لوی کپسولونه موجود ول چې په هر کپسول کې لږ تر لږه ۱۰ ګرامه کوکاېن ځای پر ځای شوي وو. نوموړي کس غوښتل د هالنډ له امستردام ښار څخه د هامبورګ له لارې ځان کوپنهاګن ته ورسوي.
د آلمان ګمرکي چارواکو ویلي دي کله چې ریل له فیهمان ټاپو څخه تیر شو، نو پولیسو دغه کس تالاشي کړ. د هغه په بیګ کې ۵۸ داسې کوچني کپسولونه وموندل شول چې د فشار په وسیله په کې کوکاېن ځای پر ځای شوي ول. د دغو کپسولونو حجم د کفترې د هګیو په اندازه وو.
په همدې ترڅ کې د نشه یي توکو دغه قاچاقبر د تېښتې هڅه هم وکړه او د ګمرک د افسر په مړوند یي خوله ولګوله (غاښونه یې ور ښخ کړل)، خو سره له دې هم په تېښته بریالی نه شو.
د چارواکو له خوا د تحقیق او پلټنو پر مهال هغه ومنله چې د کوکاېنو یو شمیر کپسولونه یي د خولې له لارې تیر کړي دي. وروسته تر دې دغه کس په بيړه نږدې روغتون ته ولیږدول شو او داکترانو یي له کولمو څخه د کوکاېنو کپسولونه را وایستل.
د چارواکو په خبره دغه کس نږدې د یوه کیلو ګرامه وزن په اندازه له کوکاېنو ډګ کپسولونه تیر کړي ول چې وروسته یي بیا له کولمو څخه را وایستل شول.
آژانسونه/ ش.ن/ ن. ز
پر اړونده موضوع زمونږ له آرشیف څخه انځوریز رپوټ: