ویلدرز، پاکستان ته ویلي چې دومره ژر د بریا ادعا مه کوه
۱۳۹۷ شهریور ۱۰, شنبه
د هالنډ ښي اړخه عوامپاله سیاستوال او د پارلمان استازي ګیرت ویلدرز، د پاکستان د بهرنیو چارو وزیر شاه محمود قریشي د تويت په مقابل کې غبرګون ښکاره کړی دی. هغه قریشي ته ویلي دي: «دومره ژر دې د بریالیتوب ادعا ونه شي. ما خپل کار نه دی خلاص کړی. زه به له نورو لارو ستا بربریت ښکاره کړم».
د ګیرت ویلدرز، له خوا د اسلام د پيغمبر د کاریکاتور د رسمولو سیالۍ د لغوه کیدو له کبله د پاکستان د بهرنیو چارو وزیر شاه محمود قریشي مسلمانانو ته مبارکي ورکړې وه. د پاکستان حکومت ادعا کړې وه چې د دې شخړیزې سیالۍ لغوه کول، د پاکستان دیپلوماتیکو هڅو نتیجه وه.
په دې هکله نه یوازې قریشي بلکې د پاکستان د اطلاعاتو کلتور وزیر فواد حسین هم په خپل تویت کې د دغو سیالیو لغوه کیدل د پاکستان د حکومت او ولس بریا بللې وه.
خو د ویلدرز په خبره دغه سیالي ځکه لغوه کوي چې د مرګ د ګواښونو د تر لاسه کولو وروسته د اسلامیستي تاوتریخوالي مخه ونیسي. د هغه له لوري په یوې خپرې شوې اعلامیې کې راغلي وو: «ما پریکړه وکړه چې دغه سیالي لغوه کړم، څو د خلکو د اسلامیستي تاوتریخوالي د قرباني کیدو مخه ونیول شي. زه نه غواړم چې مسلمانان د کاریکاتور له دغې سیالۍ څخه د اسلامیستي تاوتریخوالي د پلمې په توګه کار واخلي.»
د ویلدرز له لوري په دغه بیانیه کې وړاندې راغلي دي چې «دا یوازې زما په اړه نه ده» او په خبره یې هر هغه څوک چې د دغه سیالۍ پر ضد دي «یوازې ما نه، بلکې ټول هالنډ ته د یوه هدف په سترګه ګوري.»
خو په دې اړه د هالنډ حکومت جلا نظر لري. د دغه هیواد لومړي وزیر ویلي دي چې د ګیرت ویلډرز شخړیزه مفکوره له حکومتي پالیسۍ سره هیڅ ډول تړاو نه لري.
د ګیرت ویلدرز، له خوا د اسلام د پیغمبر د کاریکاتور رسمولو د سیالۍ په لاره اچولو خبره په نړیواله کچه د مسلمانانو له خوا له سختو غبرګونو سره مخامخ شوې ده.