نگورنو قره باغ کې لا نښتې ادامه لري
۱۳۹۵ فروردین ۱۶, دوشنبه
د آذربایجان د دفاع وزارت ویاند په باکو کې ویلي دي: «که چیرې د آرمنستان لمسون ادامه ولري، نو موږ به د جبهې په اوږدو کې پراخ عملیات پیل کړو او د خپلو ټولو وسلو څخه به کار واخلو.»
خو مخالف اړخ د نگورنو قره باغ دفاع وزارت پر آذربایجان باندې تور لگوي چې په تیرو ورځو کې یې د توغندیو، هاوان او ټانکونو بریدونو ته زور ورکړی دی. د هغوی په خبره لږ تر لږه ۳۰ عسکر او ملکي کسان د شنبې او یکشنبې په ورځو وژل شوي دي.
د یکشنبې په شپه بیا هم مرگ ژوبله رامنځ ته شوې ده. په باکو کې د دفاع وزارت د درو عسکرو د وژل کیدو خبره کوي چې د آرمنستان له ځواکونو سره په نښتو کې وژل شوي دي. د آذربایجان گاونډي جمهوریت آرمنستان د نگورنو قره باغ په پلویتوب جنگيږي. ځکه دغه سیمه چې د آذربایجان په دننه کې پرته ده، زیاتره اوسیدونکي یې آرمنیان دي.
د آرمنستان د دفاع وزارت یوه ویاند ویلي دي د دغه هیواد پوځ په ډیرو ځایونو کې پرمختگ کړی او ځینې مواضع یې نیولي دي. خو باکو بیا دغه معلومات ردوي.
په ویانا کې د کړکیچ په هکله خبرې اترې
په ۱۹۹۰م لسیزه کې د یوې خونړۍ جگړې وروسته نگورنو قره باغ خپلواکه اعلان شوی وو. خو دغه څه په نړیواله توگه په رسمیت و نه پيژندل شو او باکو د سیمي د ملکیت د ادعا پر سر ټینگ پاتې شو. په ۱۹۹۴م کال کې د رامنځ ته شوي یو اړخیز اوربند، چې تل ترې سرغړونه کیږي په اصطلاح د نگورنو قره باغ شخړې ته د پای ټکی کینښود.
د اروپا د امنیت او همکارۍ سازمان (OSCE) په منځگړتوب د سولې خبرې اترې له کلونو راهیسې له ځنډ سره مخامخ دي. د سه شنبې د ورځې له پاره په ویانا کې یوه بیړنۍ غونډه په پام کې نیول شوې ده.