ناټو: پکتیکا کي مو ۵۰ بهرني جنګیالي وژلي
۱۳۹۰ تیر ۳۱, جمعه
د ناټو د ځواکونو لخوا د جمعي په ورځ په خپري شوي خبرپاڼي کي راغلي چي دغه عملیات تیره شپه د پکتیکا ولایت په سر حوزي ولسوالۍ کي تر سره شوي دي چي په کي د بهرنیو جنګیالیو سنګرونه په نښه شوي. د پکتیکا ولایت د پاکستان سره ګډه پوله لري.
دغه خبر پاڼه زیاتوي چی دغه پټنځایونه د حقاني شبکي او نورو بهرنی جنګیالو لخوا استعمالیدل ترڅو په افغانستان کي بریدونه تر سره کړي.
په خبرپاڼي کي راغلي چي ایتلافي ځواکونو د دغه پټنځای تر معلومولو وروسته عملیات تر سره کړي چي په کي افغان ځواکونو هم برخه درلوده.
د افغانستان د شپږو ولایتونو د پولیسو مشر، جنرال ګل نبي احمدزي، هم المان غږ سره په یوي ټیلیفوني تماس کي د دغي پیښی پخلی کړی.
افغان چارواکي د حقاني شبکه په دي تورنوي چي په افغانستان کي د لوړ پوړو چارواکو په وژلو کي لاس لري.
دغه ډله په افغانستان کي د ځانمرګي بریدونو تر شاه هم لاس لري. ګمان کیږي چي د کابل پر انټرکانټیننټال هوټل برید هم د همدغي ډلی له خوا تر سره شوي وي چی په پایلي کي یي لږ تر لږه ۱۶ تنه ووژل شو.
په پام کي ده چي د رواني میاشتي تر پایه به د افغانستان د اوو سیمو امنیتي مسؤلیتونه افغان ځواکونو ته وسپارل شي.
افغان ځواکونو تراوسه پوری د بامیان، مهترلام، لښکرګاه او د هرات د ښار امنیتي چاري په لاس کی نیولي. دا پداسی حال کي ده چي د انتقال د پروسي د پیل سره د اورپکو په بریدونو کی ډیروالي راغلي.
آژانسونه/ سید ریاض
کتونکي: مسعود جهش