میسي د فوټبال لوبو څخه محروم سو

لکه څنگه چي د جنوبي امریکا د فوټبال اتحادیې، کونمې بول (Conmebol) خبر ورکړی دی، پر دغه درې میاشتي محرومیت سربیره لیونیل میسي د ۵۰ زره ډالره نقدي جریمې په ورکولو باندي هم محکوم سو.

میسي د جولای پر شپږمه په سان پاولو کي د کوپا امیریکا (Copa América) د فاینل مسابقو پرمهال د چیلي سره په مسابقه کي پر کونمې بول باندي انتقاد وکړ او ویې ویل، چي «باید په دغه اختلاس کي برخه وانه خلو.» د کامیابۍ لمانځلو پر وخت حتی بیخي حاضر هم نه سو.

د چیلي د بَیک، گاري مېډل سره د جنجال په سبب پخوا لا میسي ته سور کارت ورکول سوی او له میدان څخه ایستل سوی ؤ. ځکه نو په راتلونکي مارچ میاشت کي د ۲۰۲۲ م کال له پاره د وړتیا ښکاره کولو په لومړۍ مسابقه کي برخه نه سي اخیستلای.

د نوي درې میاشتني محرومیت په سبب هغه په څلورو دوستانه مسابقو کي برخه نه سي اخیستلای، له هغې جملې څخه د اکتوبر پر نهمه د جرمني د فوټبال ملي ټیم سره هم. په راتلونکي سپتمبر کي د امريکا په متحده ايالاتو کي د چیلي او ارجنتین او همدارنگه په اکتوبر میاشت کي یوه بله مسابقه، چي شاید له پرتگال سره وي، هم گډون نه سي کولای.

زموږ د آرشیف څخه یو انځوریز البوم:( 12.06.2015)