میرکل: د ۲۰۱۵ کال د مهاجرت کړکيج نه بايد تکرار شي
۱۳۹۷ مرداد ۲۶, جمعه
میرکل د زاکسن ایالت په مرکز دريسدن کې پارلمان ته وینا وکړه او له مسيحي سوسيال اتحاد (سي دي يو) پارلماني ډلې سره تر ليدنې وروسته یې وويل: «د رد شويو مهاجر اخراجول لا هم د پخوا په څير يوه لويه ستونزه ده.»
د آلمان د صدراعظمې په وينا ايالتي حکومتونه د رد شویو مهاجرو د بيرته استولو چارو د اسانولو له پاره د فدرالي ادارو مرستو او لازمو اسنادو ته د لاسرسي اړتيا لري. میرکل وويل، «روښانه ده چې د ۲۰۱۵م کال د مهاجرت کړکيچ بايد تکرار نه شي او تکرار به هم نه شي.»
په ۲۰۱۵ او ۲۰۱۶ کلونو کې په سلونو زره مهاجر د آلمان خاورې ته دننه شول. د میرکل په آند خلک نور په دې اړه چې حکومت به وشي کړای دومره ډير شمير مهاجر کنترول او تنظیم کړي، خوشبينه نه دي.
د آلمان صدراعظمه دريسدن ته له رسيدو سره سم، د پګيدا ښي اړخي خوځښت له يوې ۳۰۰ کسيزې ډلې سره چې د ايالتي پارلمان ودانۍ مخې ته راټول شوي ول، مخامخ شوه. پګيدا خوځښت د آلمان له پاره بديل ګوند (اې اف دې) ملاتړ کوونکی دي.
پګيدا یا د وطنپرستو اروپايانو خوځښت، د لويديځ له اسلامي کيدو، مهاجرو او په ځانګړي توګه په اروپا کې له مسلمانانو سره مخالفت کوي. دوی تر دې مخکې ډيرې مظاهرې هم په لاره اچولي دي. د پګيدا پلويانو په خپلو اعتراضونو کې د میرکل پر ضد شعارونه ورکړي او هغه يې «له خلکو سره په خيانت» تورنه کړې.
(dpa)ks/ms
د مهاجرت موضوع په تړاو له آرشيف څخه يو انځوريز البوم: