له پاکستانه ولې یو فیل په الوتکه کې بهر ته انتقالیږي؟

دغه ۳۵ کلن فيل (هاتي) کاون نوميږي چې په طياره کې به له پاکستان څخه د کمبوډيا د وحشي ژويو يوې محفوظې سيمې ته واستول شي. امريکايي مشهورې سندرغاړې او فلمي لوبغاړې شېر چې د کاون د آزادۍ دپاره يې د کلونو اوږد کمپاين کړی دی، پاکستان ته ورسېده څو دغه پېښه په خپلو سترګو وويني.

هغه د کاون د سفر نيمه برخه لګښت هم په خپله غاړه اخلي. د کمبوډيا يوه محفوظه سيمه ځکه ورته ټاکل شوې ده چې هلته اوس لا له اتياو زيات فيلان اوسيږي او اړونده کارپوهان او اړين سهولتونه پکې هم موجود دي.

کاون (فیل) په ډېرو خرابو شرايطو کې ژوند کاوه او اکثراً په زنځيرونو تړل شوی وو. هغه د اسلام آباد په مرغزار ژوبڼ کې څه باندې درې لسيزې تېرې کړې دي. يو بل فيل چې ساحلي نومېده، په ۲۰۱۲ کال کې مړ شوی وو چې ښايي د ژوبڼ د ادارې د غفلت او ناسم چلن له کبله يې خپل ژوند له لاسه ورکړی وي.  

د حيواناتو د حقونو فعالينو اوږده مبارزه کړې ده

د حيواناتو د حقونو فعالينو د کاون د آزادۍ له پاره اوږده مبارزه کړې ده. د روان کال په مې مياشت کې يوې محکمې (عدالت) په اسلام آباد کې حکم وکړ چې دغه حيوان بايد آزاد او يوه وړ محيط ته منتقل شي.

د همدې روان میلادي کال په سپتمبر مياشت کې د «فور پاوس» په نوم په ويانا کې مېشت يوې ټولنې د کاون فزيکي او رواني روغتيا وارزوله څو پيدا کړي چې آيا الوتنه ورته مناسبه ده او دا چې له نورو حيواناتو سره يو ځای ژوند کولی شي او که نه.

کاون يو کلن وو کله چې په ۱۹۸۵ کال کې د ډالۍ په توګه له سري لنکا څخه اسلام آباد ته راورسېد. دغه ډالۍ د سري لنکا د حکومت له خوا پخواني زورواکي او جنرال، ضياالحق، ته ورکړل شوې وه. په دې وروستیو کلونو کې په پاکستان کې د کاون سخت ژوند ته نړيواله پاملرنه ور اوښتې وه. په ۲۰۱۶ کال کې په آنلاين ډول څه باندې ۲۰۰ زره لاسليکونه د هغه د آزادولو په پلويۍ راټول شوي ول. 

dpa/ن ص/ خ ح