له سمندري لارو اروپا ته د مهاجرو شمير لږ شوی

د روان کال له پيله د اګست مياشتې تر ۲۴ مې نيټې پورې د مديترانې سمندرګي له لارې اروپا ته د راغليو مهاجرو په شمير کې د تير کال د همدې مودې په پرتله دوه برابره کمښت راغلی.

د ۲۰۱۶ کال په لومړيو ۸ مياشتو کې د مديترانې سمندرګي له لارې ټولټال ۲۷۲ زره مهاجر اروپا ته رسيدلي وو.

د اروپا پر لور تلونکي غيرقانوني مهاجر تر ډيره خپل خطرناک سفرونه د ليبيا له ساحلونو څخه پيليوي.

د ۲۰۱۷ کال په ۸ مياشتو کې نژدې ۱۲۱ زره مهاجر د مديترانې سمندرګي له لارې اروپا ته رسيدلي دي.

په اروپا کې د تازه مهاجرو په شمير کې د کمښت يو لامل، د مهاجرو پرمخ د بالکان لارو تړل هم ښودل کيږي.

د مديترانې سمندرګي لاره، د اروپا پر لورد مهاجرتونو يوه تر ټولو خطرناکه غيرقانوني لاره ګڼل کيږي. د مهاجرو پر مخ د بالکان لارو تر تړل کيدو او له ترکيې سره د اروپايي اتحاديې تر تړون وروسته مهاجرو دغې لارې ته مخه کړه.

په ورستيو کلونو کې په زرونو مهاجر د دغې خطرناکې لاري په اوږدو کې خپل ځانونه له لاسه ورکړي دي. تيرکال مديترانې سمندرګي ته د «مهاجرو هديره» هم ويل شوې وه.

د روان کال په نژدې اتو مياشتو کې۲۴۱۰ تنه مهاجر په مديترانه سمندرګي کې د کښتيو د ډوبيدو په پيښه کي وژل شوي. خو پر دغي لاري د تيرکال په همدې موده کې د قربانيانو شمير۳۲۱۶ تنه وو.

په سمندر کې د ژغورني موظفي ډلې د مهاجرو خطرناکې کښتۍ ژغوري. دوي مهاجر خپلو کښتيو ته پورته کوي چې بيا يې تر ډيره د ايټاليا ټاپوګانو ته رسوي.

د روان کال له پيله تر اوسه نژدي ۱۰۰ زره مهاجر د مديترانې سمندرګي له لارې ايټاليا ته رسيدلي دي.

د رپوټو پر اساس په سونو زره مهاجر په ليبيا کې له مودو راهيسې په دې تمه ناست دي چې نن يا سبا به د اروپا پر لور سفرونه کوي. ډير دغه مهاجر د افريقايي هيوادونو او منځني ختيځ دي. په دې منځ کې د پاکستاني او بنګله ديشي مهاجرو د شتون څخه هم يادونې شوې ده.

تر ايټاليا وروسته يونان، ايټاليا او قبرس هغه اروپايي هيوادونو دي چې په روان کال کې مهاجرو هلته ځانونه رسولي دي.

د ليبيا په ساحلونو کې د ساحلي ګاردونو ګومارل او د اروپايي ټولنې له خوا د دغو ساتونکو روزنې ته پام اړول هم د مهاجرو په شمير کې د کمښت لامل ګڼل کیږي.