لنډ خبرونه په متن او انځور کې

د انډونیزیا هیواد په تفریحي ټاپو بالي کې د اګونګ آتشفشان د اونیو راهیسې د الوتکو پروازونه له ستونزو سره مخامخ کړي دي. د دې اتشفشان یا اورغورځونکي غر د لوخړو او بڅرکو له امله چې تر شاوخوا ۴۰۰ مترو پورې لوړ زي د الوتکو پروازونه او ناستې ځنډیږي. ډیري پروازونه لغوه شوي هم دي. شاوخوا ۲۰۰۰ سیلانیان له دغې پيښې څخه اغیزمن شوي دي چې ډیري یې آسترالیایې سیلانیان دي.

په اسلام آباد کې د اونیو راهیسې د سړکونو بندولو تر خونړیو احتجاجونو وروسته د پاکستان حکومت اوس د اسلامستانو د ځپلو له پاره پوځ ګمارلی دی. تحصن کونکي د عدلیې وزير زاهد حمید د استعفا غوښتنه کوي. نوموړی د ختم نبوت اړوند د یوه پارلماني قانون پر تحریفولو تورن دی. د پاکستاني رسنیو په حواله د شنبې په ورځ د پولیس او مظاهره کونکو تر منځ د اخ و ډب په نتیجه کې شپږ ته وژل شوي او تر ۲۰۰ زیات ټپیان شوي دي.

د ائتلافي خبرو اترو تر ماتې وروسته د آلمان د صدراعظمې انګلا میرکل په مشرۍ مسیحي دیموکرات ګوند نن د یکشنبې په ورځ د روان سیاسي وضعیت په اړه مشورې کوي. په دې غونډه کې به د آلمان د ولسمشر فرانک والټر شټاین مایر سره د سیاسي احزابو د مشرانو د پلان شوي خبرو اترو په هکله هم بحث وشي. ولسمشر شټاین مایر له ټولو دغو ګوندونو څخه د دویم ځلي خبرو اترو او یو ائتلافي حکومت د جوړولو غوښتنه کړې.

د چين په ختیځ بندري ښار ننګبو کې د یوې چاودنې په ترڅ کې لږ تر لږه دوو تنو خپل ژوند له لاسه ورکړی دی او ډیر نور ټپیان شوي دي. ډیر شمیر ساختمانونه هغه وخت ونړیدل کله چې د پلازمېنې شنګهای په سویل ۱۰۰ کیلومترۍ پروت د ننګبو میلیوني صنعتي ښار یوې پياوړې چاودنې ولړزاوه . د احتیاطي تدابیرو د کموالي له امله په چين جمهوریت کې په تکراري ډول صنعتي پيښې رامنځته کیږي.

ویل کیږي چې په تیرو څو ورځو کې به تر ۵۰ ډير مهاجر په مدیترانې کې ډوب شوي وي. د «انسا» خبري آژآنس د لیبیا د سمندري ځواکونو په حواله رپوټ ورکړی دی چې د شنبې په ورځ د لیبیا ساحل ته څیرمه د ۳۱ انسانانو جسدونه مودل شوي دي. د کډوالو له پاره د ملګرو ملتونو عالي کمیسارۍ یوه ویاند ویلي دي چې شاوخوا ۲۰ تنه مهاجر هغه وخت په اوبو کې ډوب شول چې د پنجشنبې په شپه د مهاجرو یوه بادي کیشتۍ په اوبو کې ډوبه شوه.