لنډ خبرونه په متن او انځور کې

د چين د کميونست گوند مرکزي کميټې رئيس جمهور شي جين پينگ، تر نورو پنځوو کالو د گوند د عمومي منشي او ولسمشر په توگه تائيد کړ. د ملي کانگرې پای ته تر رسيدو وورسته په پيکنگ کې د گوندي رهبر د ټاکنو له پاره رایه اچونه وشوه. ترغونډې وروسته شي د سياسي دفتر د دوامدارې کميټې اووه غړي معرفي کړل. د دې د مخه د شي ترڅنگ يوازې لومړی وزیر لي کيانگ پر خپل څوکۍ پاتې دي.

له آلمان څخه اخراج شوي ۱۴ تنه افغان مهاجر د چهار شنبې په سهار کابل ته رسيدلي دي. په برلين کې د آلمان د کورنيو چارو وزارت يوې وياندې وويل چې په اخراج شويو کې ۱۱ مجرمان دي او نور درې هغه پنا غوښتونکي دي چې د خپل هويت د څرگندولو څخه يې ډډه کوله. دې وویل دغه مهاجر د وژنې، پر ماشومانو د جنسي تيري، وهلو ټکولو او درغليو په قضيو کې ښکيل ول. درې تنه چې نه غوښتل خپل هويت په ډاگه کړي له بايرن ايالت څخه وو.

د سعودي عربستان وليعهد بن سلمان د ډيرو محافظه کارانه مذهبي اصولو څخه د خپل هيواد د ساتلو اعلان کړې دی. نوموړي په رياض کې اقتصادي فورم ته د وينا پر مهال وويل چې دی سعودي عربستان ته د يوه «معتدل اسلام لرونکي هیواد» په سترگه گوري. مذهبي افراطيانو ته په اشارې سره محمد بن سلمان وويل چې دی غواړي «تخريبي نظریې» له «منځه» يوسي. نوموړي وويل چې د سعودي عربستان وگړي د يوه نورمال هيواد غوښتونکي دي.

د آلمان جمهور رئيس فرانک والتر شتاين مایر، د پخواني شوروي اتحاد له وروستي ولسمشر ميخايل گورباچوف سره په ليدنه کې د آلمان او روسیې د اړيکو د ښه کولو پر لارو چارو خبرې وکړې. شتاين ماير د دغه ليدنې کتنې وروسته وویل چې گورباچوف راته د هغه څه په باره کې چې ستونزمن دي د خبرو اترو مشوره راکړه. د آلمان ولسمشر فرانک والتر شتاين ماير په دې تيرو اووه کالو کې د آلمان لومړی رئيس جمهور دی چې روسیې ته سفرکوي.

بنگله ديش او ميانمار له راخين ايالت څخه د بې ځايه شويو روهنگيا مهاجرو د بيرته ستنولو پر سر سلا دي خو د مهاجرو د ستنولو د نيټې او پلان په اړه یې تر اوسه ثابت گامونه نه دي پورته کړي. د بنگله ديش دولتي خبري آژانس خبر ورکړې چې دواړه خواوې يوازې د نوامبر تر ۳۰ نيټې پورې د يوې گډې کاري ډلې په جوړولو سلا شوي دي. د بنگه ديش د کورنيو چارو وزیر د «امنيتي مسايلو» په اړه د خبرو اترو له پاره ميانمار ته تللی.

ترکۍ سياستوالې ميرال اکسينر د يوه نوي منځني ښی اړخه گوند د بنسټ ايښوولو اعلان وکړ. نوموړې په دې توگه غواړي د ۲۰۱۹ م کال په ولسمشریزه او پارلماني ټاکنو کې د ولسمشر رجب طيب اردوغان مخالفه کانديده شي. دې په انقره کې خپلو پلويانو ته د وينا پر مهال وويل چې په ترکيه کې ديموکراسي له «گواښ» سره مخ ده. دی وويل چې گوند به یې عدالت رامنځته کړي.