د فرانسې او بریتانیا ترمنځ د مهاجرت د مخنیوي پرسر توافق شوی
۱۴۰۱ اسفند ۲۰, شنبه
د بریتانیا او فرانسې په نوي تړون کې د مانش کانال په سیمه کې د ګزمو ډیرښت، د بې پیلوټه الوتکو استفاده او د فرانسې په خاوره کې د مهاجرینو نیول او ځای په ځای کول شامل دي.
له اروپايي اتحادیې څخه تر وتلو وروسته، د بریتانیا او فرانسې ترمنځ دغه تړون مهم شمیرل کیږي. د فرانسې ولسمشر امانویل ماکرون په دې تړاو تر ملاقات وړاندې د بریتانیا د لومړي وزیر ریشي سوناک تود هرکلی وکړ. ماکرون خبریالانو ته په خبرو کې وویل چې له اروپايي ټولنې څخه تر وتلو وروسته اړیکې کمزورې شوې وې خو سوناک بیا وویل چې اوس د دې وخت راغلی چې اړیکې باید بیرته غښتلې شي.
وروسته له هغې چې سوناک د تیر کال په اکتوبر میاشت کې واک ته ورسید، د نوموړي حکومت د کوچنیو کښتیو له لارې بریتانیا ته د ناقانونه کډوالو د مخنیوي په برخه کې جدي اقدامات عملي کړي دي. دغه اقدامات وروسته تر هغه عملي شول چې په تیرو کلونو کې بریتانیا ته د ناقانونه کډوالو شمیر ۴۵ زرو ته لوړ شو چې د تیرو دوو کلونو په پرتله ۵۰۰ سلنه زیاتوالی ښيي.
د همدې موضوع په تړاو دا هم لوستلی شئ: بریتانیا ته د سمندري لارو مهاجرت د محدودولو نوې طرحه
د بریتانیا نوي حکومت او په خپله د بریتانیا لومړي وزیر حکومت ته داسې قانون وړاندې کړی چې له مخې به یې ټول هغه ناقانونه کډوال چې د کوچنیو کښتیو له لارې بریتانیا ته رسیږي او د پناه غوښتنه کوي، مخه ونیسي او په دې برخه کې بریتانیا د فرانسې همکارۍ ته اړتیا لري.
د نوي تړون له مخې، بریتانیا به له فرانسې سره د فرانسې په خاوره کې د مهاجرینو د میشت کیدنې د ځایونو په جوړولو کې مرسته کوي او فرانسه به د مهاجرینو د تګ راتګ په سیمو کې ګزمې ډیروي. سربیره پر دې، ټاکل شوې چې په ساحلي سیمو کې به له نوې ټکنالوژۍ او ان بې پیلوټه الوتکو څخه کار واخیستل شي.
د معلوماتو له مخې، د بریتانیا له لوري فرانسې ته دغه مالي مرستې به په مختلفو قسطونو کې ورکړل شي چې له دې جملې فرانسې ته یوازې د ۲۰۲۳ او ۲۰۲۴ کلونو کې ۱۲۵ میلیونه پاونډه ورکړي. بریتانیا وايي چې فرانسه په دې پروسه کې د پام وړ ډیره ونډه اخلي.
په بریتانیا کې په ۲۰۲۲م کال کې د پناه غوښتنې کچه د ریکارډ کچې ته لوړه شوې او د شمیرو له مخې دا کچه په تیرو شلو کلونو کې بې سارې وه. د بریتانیا د حکومتي شمیرو له مخې په تیر میلادي کال کې په مجموعي ډول شاوخوا ۷۵ زره د پناه غوښتنې شوې دي کوم چې د اروپايي ټولنې د ټولو هیوادونو په پرتله کم شمیر دی.
رویترز / خ.ح / ن.ص